MRB Chairman thar in Chief Minister a kawm

Mizoram Rural Bank (MRB) Chairman thar Sheryl L. Vanchhong chuan nimin khan Chief Minister Zoramthanga chu a Pisa-ah hmuin MRB hmalakna tlangpui leh ruahmanna an neihte hrilhin mipuiten tangkai zawka Rural Bank an hman theih dan turte an sawi dun.

He inkawmna ah hian Chief Minister chuan Mizoram Rural Bank chu an inzarpharh that avang leh an hnathawh that avangin mipuite hriat an hlawh a, khawvel changkang zelah mitinin Bank nena inthlunzawm kan mamawh vek tawh avangin chumi kawngah chuan MRB hian hna a thawk that thu leh lawmawm a tih thu a sawi a. Hma an sawn zel theihna tura sawrkar lama mamawh an neihte thlen zel thin turin a chah bawk.

MRB Chairman thar Sheryl L. Vanchhong hian tunhnaiah Chief Minister-in Recapitalisation lama an harsatna a sutkian sak avanga lawmthu sawiin, Mizoram Rural Bank chu NE India huapa Rural Bank lian ber, tunhnai maia NABARD pawhin Best Regional Rural Bank-a a thlan an nih thu sawiin, Annual Capital Turn Over pawh cheng vbc. 4880 chuang a tlin thu a tarlang a ni.

Mizoram Rural Bank hian tun dinhmunah Branch 102 nei mekin thawktu nghet mi 475 an awm a, thingtlang hmun kilkhawr zawka mite tan Mini ATM pawh 270 nei mekin a dang 75 neih belh tumin hma an la mek a. Financial Inclusion lama hmalaknaah khawtina Self Help Group te nen an thawkho tha hle niin an sawi a ni.