CM in West Phaileng-ah Community Service Centre leh Residential School Astro Turf thar a hawng

West Phaileng-a Community Service Centre thar leh Residential School Astro Turf thar chu nimin khan Chief Minister Zoramthanga chuan a hawng.

Chief Minister hian nimin khan West Phaileng hi tlawhin NEC Fund cheng nuai 300 senga West Phaileng Bazar Building thar sakna tur hmunhma a en hnuah Community Service Centre thar hi a hawng a, hemi hnu hian Astro Turf thar hi a hawng lehin, Playground thar-a ‘MLA Cup Tournament’ a kick-off hnuah heng thil hawn thar te lawmna neih zui a ni. Chief Minister chuan kum 2020 December thla Covid vanglaia a lung an phum hawn theih a ni ta chu lawmawm a tih thu sawiin, “Hripui vang khan hun reilote chhunga kan zawh hman pawh kan beisei ngam lova, nimahsela reilote chhungin tha taka zawh a lo ni ta si hi Pathian malsawmna a ni. In vannei hlein ka hria,” a ti a. Hmun hrang hrangah hmasawnna thar hmuh tur a tam hle tih pawh sawiin, “Covid hripui karah pawh heti khawpa nasa hian sawrkarin hna a thawk a ni a, hripui khan min tuam lo phei se chuan hmasawnna hi kan hmu nasa hle dawn tih hi a chiang a ni,” a ti bawk.

Sports & Youth Services changtu Secretary Dr. Lalrozama IAS kaihhruai he hunah hian khual zahawm Sports Minister Robert Romawia Royte pawhin Astro Turf hawn thar chu Mizoram khawthlang lama thalaite leh naupang zawkten hmasawnna an hmuh theihna tura Residential Sports School changtlung tak lo ding tur zinga hnathawh pakhat mai a la ni tih a sawi a. “Hna dang kan thawh mekte kan tihhlawhtlin hunah phei chuan helaiah hian Sports leh School Complex changtlung tak kan nei dawn a, thalaite tana hmasawn zelna tur thil hlu kan nei dawn a ni,” a ti bawk.

West Phaileng-a Residential School sakna atan hian Pradhan Mantri Jan Vikas Karyakram atangin kum 2019-20 khan sum cheng nuai 3286.34 hmuh a ni a, he Project ken Artificial Turf hi cheng nuai 549.91 hmanga siam niin M/s Decor, India, Guwahati te chu hna thawk tura thlan an ni a, March, 2021 khan thawk tanin kumin July thla khan an zo a ni. Phullem phah chin zau zawng hi a dung meter 100 leh a vang meter 60 niin inkhelhna tur bik playground zau zawng hi meter 95X56 a zau a ni. A sirah hian Residential School Academic building te, Administrative building te, Principal Room, Hostel building dangte sak mek an ni a. Playground hian Pavilion changtlung tak neiin, a Complex hi tha taka hung a ni bawk.

Community Service Centre hi PMJVK sum vek cheng nuai 140 senga sak niin December 15, 2020 khan Chief Minister hian a lung a lo phum tawh a. Centre building hi a dung mtrs 15.70 leh a vang mtrs 8.70 niin, Ground Floor-ah Committee Room, Office, Library leh Computer Room te a awm a, First Floor hi Multipurpose atana hman theih tura duan a ni.

Comments

Popular News (Last 30 Days)

LPG man bithliah thar