Family Oriented SEDP Phase 2 tanpuina sum September 2023 ralhma a sem chhuah vek tum a ni

Family Oriented SEDP Phase 2 kalpui dan tur chungchang ngaihtuahin nimin khan SEDP Executive Board thutkhawm neih a ni a, Family Oriented SEDP Phase 2 hnuaia First Instalment chu a tul ang angte tihfel a nih hnuah September 2023 ralhma ngeia sem chhuah vek hman tum a ni.

Eizawnna ngelnghet leh hmasawnna siam tura chhungkaw tinzawna duan, Sawkar Flagship program Family Oriented Socio-Economic Development Policy (FO SEDP) Phase 2 kalpui dan tur ngaihtuaha thutkhawm Planning & Program Implementation Department Committee Room-a neih ah hian Deputy Chief Minister Tawnluia chuan SEDP Executive Board chu Sawrkar Flagship Program SEDP kenkawhna kawnga pawimawh ngaihtuahtu leh roreltu a nih thu sawiin, Sawrkar pawhin a ngai pawimawh hle a ni, a ti a. Board Member leh Line Department hrang hrangte chu Flagship program tihhlawhtlin kawnga theihtawp chhuah turin a chah a. SEDP hnuaia hma la tha leh entawntlakte chu midangte tih phur nana hman theih tura phochhuah tam a pawimawh thu a sawi bawk.

Family Oriented SEDP kaltlang hian chhungkaw eizawnna bultanna siam sak leh tanpuina pek hmangin Mizoram chhunga mimal leh chhungkua, a tam thei ang ber dinhmun tha zawka hlankai tum a ni tih sawrkar thuchhuah chuan tarlangin, Family Oriented tih a nih angin tanpuina hi chhungkua anga dawn tur a nih thu leh chhungkaw pakhat atangin beneficiary pakhat chauh awm theih a ni tih tarlan a ni a. Mizoram Sawrkar hnuaia Department - Agriculture, Horticulture, AH&Vety, Fisheries, Sericulture, Land Resources, Soil & Water Conservation, Commerce & Industries, Urban Development & Poverty Alleviation leh Tourism Department-te hnuaiah trade item (eizawnna kalpui tur) te thlan theih a ni.

Family Oriented SEDP-ah hian a thawh khatna ah chhungkaw 60,000 te hnenah Rs. 50,000/- theuh pek ni tawhin a thawh hnihna (2nd Phase)-ah hian beneficiary 60,000 thlanchhuah leh tur a ni a, MLA Constituency tin, Bial 40 atanga chhungkua 1,400 theuh thlanchhuah atangin hamthatna dawngtu beneficiary 56,000 an awm thei dawn a; heng baka chhungkaw 4,000 dangte chu MLA Constituency lian deuh ah pek belh emaw, a mamawh zual chhungkua te SEDP Governing Board remtihnaa pek tur a ni ang. He huna tarlan a nih danin tun dinhmunah beneficiary 59,736 (Agriculture 2163; AH & Vety 37,379; Commerce & Industries 10,108; Fisheries 816; Horticulture 3055; LRS&WC 5612; Sericulture 50; Tourism 9 leh UD&PA 544) tihfel tawh niin, beneficiary dang 264 te chu tunkar chhunga tihfel hman tum a ni.

Family Oriented SEDP Phase 2 hi instalment hnih-a pek tur niin First instalment-ah beneficiary-te'n Rs.25,000/- theuh dawngin Second instalment-ah Rs. 25,000/- an dawng leh dawn a, tanpuinate hi Line Department-te kaltlanga sem tur a ni a. First instalment hi a tul ang angte tihfel a nih hnuah September 2023 ralhma ngeia semchhuah vek hman tum a ni.

Nimin-a thutkhawm ah hian Family Oriented SEDP Phase 2 kalpui tura beneficiary neih dan, sum pekchhuah dan tur leh hun bituk chhunga kalpui dan tur ruahmanna duante zirchian a nih bakah beneficiary-te hmalak dan enzuina leh hlawhtlinna changte hmalakna phochhuah sakna (Success Story Documentation) tih dan tur tulte sawiho niin, hemi kawnga Department lam hmalak tawh chinte ngaih-thlak a ni a. A titha zualte lawmpui leh chawi-mawi kawnga ruahmanna neih dante pawh sawiho a ni bawk.

Nimin-a SEDP Executive Board thut-khawm hian Mizoram State Planning Board Vice Chairman H. Rammawi bakah Board Member MLA leh Department hrang hrang aiawhte an tel a ni.