Mizoram-a lirthei za zela 30 vel document a nung lo

Mizoram-a lirthei awm zawng zawng atanga za zela 30 zet chu document nung lo a ni.

Transport Department in thuchhuah siama an tarlan danin tun dinhmunah Mizoram pumah lirthei register awm zat chu 2,91,883 (as on 31 July, 2023) a ni a, heng zingah hian document nung lo, Chhiah ba chu 89,225 zet niin hei hi Mizoram puma lirthei register zawng zawng atanga chhutin 30 % zet a ni a. Hei bakah hian tunah hian hian Driving Licence 4,83,312 awmin, heng zinga engemaw zat hi renew ngai a ni bawk.

Lirthei Chhiah pek loh avanga document nunglo hi Aizawl District-ah tam berin 44,955 zet a awm a, Lunglei District-ah 10,322 leh Cham-phai District-ah 10,017 awm bawkin Kolasib District-ah 8011; Siaha District-ah 4907; Lawngtlai District-ah 4023; Serchhip District-ah 4109 leh Mamit District-ah 2881 a awm a. Lirthei neitu ten Chhiah an pek loh zingah hian MV Tax pe lo tam berin 34,680 zet an awm a, Fitness Certificate ti nung lo 24,442 leh Passenger & Goods Tax (P&G Tax) pe lo 21,761 an awm a, heng bakah hian Permit nung lo 8342 an awm bawk a ni.

Chhiah pek loh avanga lirthei document thite leh Driving Licence nung lo chunga lirthei khalhte hi danin a khap tlat bakah a him lo tih pawh Transport Department chuan sawiin, December ni 31, 2023 thleng ‘khawngaihna hun’ (grace period) hawn leh a nih thu leh Driving Licence thi kawl emaw, lirthei document fel lo kawl tan Late Fee/penalty pe lovin Driving Licence/Document thite tinung turin mipuite an sawm a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar