Darlawn-ah BDO Office sak thar hawngin Multipurpose Hall sak tur lungphum phum a ni

Rural Development Minister Lalruatkima chuan Darlawn RD Complex-ah Darlawn BDO Office sak thar chu nimin khan a hawng.

Darlawn BDO Office sak thar hawnna puala inkhawm BDO Conference Hall-a neih ah RD Minister chuan tun sawrkar hun kal mekah hmar tlangdungin hma an sawn theihnan nasa takin hna an thawk tih sawiin, tunah chuan Mizoram hmun dangte ang bawkin ke an chhep rual thei ta chu a lawmawm takzet tih a sawi a. RD Department in hma an lak dan chi hrang hrangte tarlangin, chung zinga pakhat Darlawn BDO Office building hlui tawh tak chu a tharin an thlak ta chu lawmawm a tih thu leh hei hian thawktute leh anmahni dawr thintute tan phurna leh thathona pe thar lehzual turin duhsakna a hlan a, mipuite tana malsawmna thlentu, Darlawn RD Block tana malsawmna leh hlimna thlentu ni turin thawktute pawh inpekna nen theihtawp chhuah turin a chah a ni.

He hunah hian khual zahawm leh bialtu MLA, Education Minister Lalchhandama Ralte chuan a bial chhungah BDO Office building thar tha tak an nei ta chu lawmawm a tih thu a sawi a, a bik takin RD Minister Lalruatkima chungah lawmthu a sawi a. RD Department kaltlanga Tuivawl bial-a hna tam tak an thawh sak avanga hma an sawnna chi hrang hrang tarlangin, RD Officer leh Staff zawng zawng chungah lawmthu a sawi a, a bial chhunga sawrkar hmalakna ah lawmthu a sawi bawk.

Darlawn BDO Office sak thar hi MGNERGS leh MzSRLM tangkawpin cheng nuai 161.64 senga sak a ni a, BDO Darlawn RD Block chu Implementing Agency niin May 9, 2022-a sak tan leh July 31, 2023-a sak zawh a ni a, Mizopa chhiara chhawng li (4) niin Basement-ah Office Canteen leh Chowkider quarters a awm a, Ground Floor-ah Officer Room 1, Staff Cell 3 leh inthiarna awmin, First Floor-ah hian Officer Room 2, Staff Cell 3 leh inthiarna a awm a, Second Floor-ah Conference Hall-cum-Training Centre, mi 108 len theihna leh inthiarna a awm thung a ni.

He hunah hian Bialtu MLA leh School Education Minister Lal-chhandama Ralte hian Darlawn Venghlun-a Multipurpose Hall sakna tur lungphum a phum nghal a, he Multipurpose Hall hi cheng nuai 720 senga sak tura ruahman niin Fredy Vanlalngila, Dinthar-I, Aizawl chuan a sak hna an thawk dawn a. August 12, 2023 atanga sak tur niin thla 24, kum hnih (2) chhunga sak zawh tura ruahman a ni a. Chhawng thum (3) ni tura ruahman niin Ground Floor-ah Table Tennis Room, Combat games Room, Public Gym, Fair Price Shop, NGO Office, Canteen leh Toilet dah a ni anga. First Floor-ah Badminton Court 2, Meeting Room, Stage leh Green Room, Store, Sound Control Room leh Toilet dah tur niin, Second Floor-ah Multi Utility Room leh Store a awm ang.