AKAM pualin Governor in lehkhabu pathum tlangzarh

Mizoram Governor Dr. Hari Babu Kambhampati chuan Azadi Ka Amrut Mahotsav (AKAM) lawmna kal mekah Dr. Laltluangliana Khiangte ziah lehkhabu pathum, tawng hrang chi thum – Hindi, English leh Mizo tawng a ziak te chu nimin khan a tlangzarh.

Nimin-a Governor in a tlangzarh tak te hi ‘Heroes and anti-Heroes’ (English Version), ‘Mizo Nataak - 2 : Rani Ropuiliani’ (Hindi Version) leh ‘History of Mizo Literature’ ( Mizo Version) te a ni a. Governor chuan a tlangzarh tak heng Lehkhabu pathum te chu Lehkhabu satliah ni lovin Hnam rohlu a ni tiin a ziaktu chu a fak a. Dr. Laltluangliana Khiangte kutchhuak te enin Mizo literature tana a thawh hlawk piah lamah Mizote chanchin, an huaisenna bakah ram leh hnam chhanna atana an inpekna te India ram hmundanga miten an hriat phah nia a hriat thu a sawi bawk. Governor chuan Lalnu Ropuiliani chanchin atang hian mahni ram leh hnam hmangaihna, mahni hnam chhanna atana nun hlantute an ropuizia leh kan hlut a pawimawh ziah te a langchiang em em tih sawiin, Mizo thuziakmite zingah Hindi tawng a Lehkhabu ziak emaw, letling an tam loh laiin lehkhabu tha tak Hindi tawng in lehlin a ni leh ta chu thil lawmawm tak a ni tih a sawi bawk.