Mizoram atanga ruihhlo umbo a nih theih nan sawrkarin theihtawp a chhuah - Minister, SW&TA

Social Welfare & Tribal Affairs Minister Er. Lalrinawma chuan Mizoram atanga ruihhlo umbo a nih theih nan sawrkarin theihtawp a chhuah tih a sawi.

District Level Task Force on Ruihhlo Do thutkhawm nimin-a Siaha-a neih a hmanpuina Social Welfare & Tribal Affairs Minister, Working Committee on Ruihhlo Do Chairman ni bawk Er. Lalrinawma chuan Mizoram atanga ruihhlo umbo a nih theih nan sawrkarin theihtawp a chhuah tih tarlangin, ruihhlo dona tur hian sum cheng vbc. 3 chu semchhuah tawh a nih thu a sawi a. Sawrkar chauhin ruihhlo a do hneh thei lo tih sawiin, Mizoram chhunga NGO hrang hrangte nen thawhhona tha tak neih niin Task Force member-ah pawh ruat an nih thu a tarlang a. Ruihhlo Do chu thil awlsam tak a ni lo a, inpumpekna leh tanho ngai tak a ni tih sawiin, thalaite ruihhlo laka an fihlim zel theih nan thawhhona tha a pawimawh takzet a ni, a ti.

SW&TA Minister chuan Siaha District chu Myanmar nena ramri nei a nih avangin nasa leh uar zawk a ruihhlo do pawh kalpui a tul hle tih sawiin, Task Force on Ruihhlo Do-te pawh tha thlah mai lova rim zawk a thawk turin a ngen a. Tun dinhmuna Siaha District Level Task Force on Ruihhlo Do-te hmalakna chu fakawm a tih thu sawiin, ram leh hnam tana thawk an ni tih in hre reng turin a chah a. Thahnem ngaihluat avanga mi thenkhat sawiselna pawh an tawh ngei a rin thu sawiin, chutiang karah pawh rilru hnual mai lova rilru puitling tak pu chung a ram leh hnam tana thawk zel turin a sawm a ni.

Ruihhlo chu mimal maia do hneh theih a ni lo tih sawiin Minister Er.Lalrinawma chuan, mitin tanrual a ngai a, thawhhona tha tak a awm theih nan mitinin theihtawp chhuah a tul thu a sawi a. Ruihhlo do kawngah mipuite pawhin tihtur pawimawh tak an nei tih sawiin, mahni kal chhuak thei kher lo mahse, ruihhlo do kawnga ke pen chhuakte chu theihtawp a lo tawiawm tur in a ngen a. Mipuite tel lo chuan ruihhlo do chu thil harsa tak a nih avangin mipuite tawiawmna tha a awm theihnan mipuite pawh ruihhlo do kawnga nasa zawk a penchhuak leh tan la turin a sawm a ni.

He hunah hian District Level Task Force on Ruihhlo Do Chairman leh District Bawrhsap Lalhmunsanga chuan an hmalak tawhna leh hmachhawp te tarlangin, Village Level Task Force chu VC 31-ah din a nih tawh thu leh din mek zel a nih thu a sawi a. District Level Task Force on Ruihhlo Do Meeting thuchhuak angin 24×7 Information Desk siam niin Master Trainer pali ruat an nih tawh bakah Training tura dilna thawn a nih bakah De-Addiction and Drug Treatment Centre pahnih- Agape Home (Zero point) leh Kalvari Healing Ministry (Siahatla) ah te 'Spot Verification' neih a nih tawh thu a tarlang bawk.