India Sipai huaisen Mizoram mi 56 te chanchin tarlanna lehkhabu Governor in a tlangzarh

Mizoram mi leh sa, India Sipai huaisen 56 te chanchin tawi tarlanna lehkhabu, ‘Bravehearts of Mizoram’ tih chu nimin khan Mizoram Governor Dr. Hari Babu Kambhampati chuan a tlangzarh.

Mizoram Governor hmalakna a Raj Bhavan in a buatsaih he lehkhabu tlangzarhna hunah hian Governor chuan Martar chhungte hnenah lawmthu sawiin, an hmangaih kalta te chu kan tana pasaltha, mihuaisen leh Martar te an ni tih a sawi a. Lehkhabu anga Martar te hming leh nihna tawi siam chu kan Martar te chawimawina leh hriatrengna atana kan bat leh tih makmawh a ni tih sawiin, Lehkhabu te hi Martar chhungte hnenah a hlan nghal bawk.

Nimin-a he lehkhabu tlangzarhna hun Raj Bhavan Banquet Hall-a neih ah hian Martar te chhung leh khat mi 20 chuang tel theiin Martar chhungte atangin thusawi ngaihthlak a ni a. Governor hnenah hian an harsatna te pawh an thlen nghal bawk a ni. Mizoram atanga India Sipai a tang zinga Martar 56 te hming hi National War Memorial, New Delhi-ah tarlan a ni a. Mi pakhat hming leh nihna te hi War Memorial bang cheina Brick (leirawhchan) pakhat-ah zel ziah a ni.

He Lehkhabu thu hmahruai ah hian Mizoram Governor Dr. Hari Babu Kambhampati chuan February 20, 2023 khan New Delhi-a National War Memorial a tlawh thu leh hemi ni tak, February 20 hi Mizoram Statehood Day a ni lo ni tih ziakin, “Kan ram tana an nunna hlu tak hlantu, martar te thlan han tlawh a, anmahni zahna chawimawina chibai buk chu ka tan chuan thil ropui tak a nih rualin an thil tih ropui tak leh ram tana ka thil tih chhun te chu khaikhin chi rualah ka dah lo a. An inpekna hlu tak avang hian zalenna, remna leh hmasawnna kan nei chho mek a ni. Kan ram chuan kan pasaltha huaisen te hi zahna chibai a buk a, midang tana an nunna hlu tak hlantute chungah hian kan lawm kumkhua tawh ang,” tiin a ziak a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar