Mizoram-ah thla 7 chhungin Heroin man a tam

Kumin January atanga July ni 31 thleng khan Mizoram-a Excise & Narcotics Department leh Police te chuan Heroin kg. 95 leh gram 683 an man tawh a, kum danga kum tluana an man thin aiin a tam tawh zawk a ni.

Kumin-a thla 7 chhung hian Excise and Narcotics Department hnathawkte chuan Heroin hi kg. 52 leh gram 854 man tawhin Police te chuan hemi hun chhung vek hian Heroin kg. 42 leh gram 829 an man tawh bawk a ni. Police-te chuan thla 7 chhung hian Methamphetamine kg. 68 leh gram 21 man bawkin Heroin kaihhnawihah hian thubuai 109 ziaklutin mi 170 an man tawh a. Methamphetamine tawlhrutu a puh mi 17 man tawhin thubuai 9 an ziaklut bawk.

Kum 2021 February thla a Myanmar sipaite’n sawrkarna an chhuh luih hnu khan a bik takin Mizoram dep Chin State-ah sawrkarin awmzia a nei thei lova. Hemi avang hian Myanmar atanga Mizoram leh Manipur a ruihhlo tawlhruk hi a pung ta hluai a. Tunhnaia Manipur a tharum thawhna nasa tak thleng avangin Myanmar ramri khar a ni a. Manipur lama kal tur tam tak Mizoram lama an rawn tawlhluh ruk avangin ruihhlo lo lut hi a pung leh zual niin helam buaipuitute chuan an sawi a ni.

Hetianga Mizoram kaltlang a ruihhlo lo lut tam ber hi State pawna hralh tura ruahman a ni chungin engemawzat a tangkhang a. Chumi avang chuan Mizoram-ah naupang lam ruihhlo khawih thar an tam niin thuneitute chuan an sawi a. Kumin July thla tawp thleng khan ruihhlo vangin mi 47 an thi tawh bawk a ni.