Mizo Inneih, Inthen leh Rokhawmna Dan siamtha

Mizoram State Law Commission chuan nimin khan 'Mizo Inneih, Inthen leh Rokhawmna Dan, 2024' siamthat chungchang an sawiho.

Nimin khan Mizoram State Law Commission thutkhawm vawi 42-na chu an Chairman Lala Khobung hovin a Office Chamber-ah neih a ni a, he hunah hian 'Mizo Inneih, Inthen leh Rokhawmna Dan, 2024' siamthat chungchang hi sawiho niin hemi chungchang hi hun engemaw chen atang khan Law Commission chuan buaipui tawhin a tam zawk chu zawhfel a nih tawh thu nimin thutkhawm ah hian tarlan a ni a. He Dan hi Law Commission hmasa ber R. Lalrinawma, Ex-Dy. Speaker Chairman-na hnuaiah buaipui niin, a hnu a Chairman John Siamkunga, Ex-MLA hova zut mam lehin kum 2014 khan Mizoram Legislative Assembly chuan hman theih turin a pass a, Februry 13, 2015 atanga hman tan a ni.

He Dan hi siamthat ngai ni a hriat a nih avangin Law Commission pathumna Chairman, Lal Khobung hovin enzui a ni a. Siamthat rawtna te pawh Central YMA leh MHIP Gen. Hqrs. bakah mimal atangte a dawn a ni a. Rawtna atanga an pawm langsar zingah 'Mizo' tih Dan dinglaiin a hrilhfiah chu sawrzim hret a ni a. Inneihna chungchangah kan tihdan pangngai Biak In-a Kut insuih la kalpui thovin, Biak In thleng kher lova Mizo Dan-a man leh mual inhlan chu Inneihna tlingah pawm nise tih te a tel a ni.