Ram leh hnam hmasawnna daltu lian tak chu ruihhlo a ni - SW&TA Minister

Social Welfare & Tribal Affairs Department changtu Minister Er. Lalrinawma chuan ram leh hnam hmasawnna daltu lian tak chu ruihhlo a nih thu a sawi.

Kolasib DC Conference Hall-a District Level Task Force on Ruihhlo Do thutkhawm nimin-a neih a hmanpuina ah Social Welfare & Tribal Affairs Minister Er. Lalrinawma chuan ram leh hnam hmasawnna daltu lian tak chu ruihhlo a nih thu hi sawiin, chhungkua leh khawtlang zalen leh nuam siam tur chuan ruihhlo do a pawimawh thu a sawi a. Ruihhlo tih remna tur a hmalakna beihpui thlak nan State Level Core Committee din a nih thu leh chumi hnuaiah District Level leh Village Level-te awmze nei tak a kalpui tura duan a nih thu sawiin, he hmalakna tihlawhtling tur hian Sawrkar, Kohhran, Tlawmngai pawl leh khawtlang hruaitute thawhhona a pawimawh thu a sawi bawk.

Kolasib District Bawrhsap John LT. Sanga kaihhruai he hunah hian Kolasib Addl. SP David JB chuan ruihhlo dona kawnga an hmalakna hrang hrang te tarlangin, kumin chhungin Kolasib, Kawnpui, Bairabi, Vairengte, Bilkhawthlir leh Saiphai-ah te zirlai 2506 te hnenah Ruihhlo that loh zia inzirtirna pek a nih tawh thu a tarlang a. Kolasib District chhung a inenkawlna Home hrang hrangah ruihhlo vang a enkawl mek mi 554 an awm mek thu leh ruihhlo kaihhnawih ah mi 5 man an nih dan leh ruihhlo cheng nuai 16 chuang man man a nih thu a sawi bawk a ni. 

Kolasib-a Asst. Commissioner of Excise & Narcotics VL. Muana pawhin rakzu litre 1788, Sap zu um puitling 7191, Beer can 3876, Heroine kg. 2.01 leh Methamphetamine gram 734.78 an man tawh thu sawiin, NDPS Act 1985 hnuaiah thubuai 18 leh MLP Act 2019 hnuaiah thubuai 1754 ziahluh a nih thu a tarlang bawk a ni.

District Level Task Force on Ruihho Do thutkhawm ah hian zirna In hrang hrang leh Kohhran Program-ah te Ruihhlo that lohna leh ruihhlo laka fihlim tur a inzirtirna kalpui dan tur te, Zirtirna pe turin Resource Person ruat a nih tawh thu te, Anti-Drugs Club din a tul thu leh Veng tinah ruihhlo do kalpui nan Village Level Committee din a tul thu sawilan a ni a. Sub-Headquarters YMA leh YMA Branch hrang hrang hmalakna te ngaihthlak a ni bawk.