Mizoram Police leh YMA in ruihhlo dona leh Kuhva rah hmanga sumdawnna an sawiho

Mizoram Police leh Central YMA chuan ruihhlo dona kawngah nasa zawka tanlak ho zel a nih theih nan thawhho zel nise an ti.

Nimin khan DIG Northern Range Lallianmawia kaihhruaiin Mizoram Police Conference Hall, PHQ, Aizawl-ah Mizoram Police hotute leh Central YMA hruaitute chuan ruihhlo chungchang leh kuhva rah hmanga sumdawnna chungchang an sawiho a, he hunah hian Mizoram in ruihhlo avanga harsatna kan tawh mek leh ruihhlo tam tham tak man anih thin chungchanga thawhhona tha zawk neih zel a tul thu sawiho niin Ruihhlo avanga kan buaina leh harsatna tawh mek hian khawpui chauh ni lo, thingtlang kilkhawr ber thlenga min fanchhuah tak avangin awmze nei zawka do a nih theihnan te, Drugs lo luhna District hrang hrangah te nasa zawka tanlak ho zel anih theihnan thawhho zel tha an ti a. Rampawn atanga kuhva ro lo lut avanga harsatna kan tawh mek pawh sawiho niin tanlak tlan zel tha tih a ni bawk.

Nimin-a thutkhawm ah hian Mizoram Police hotute atangin DIG (Northern Range) bakah, DIG (Eastern Range) leh Aizawl, Champhai, Kolasib, Mamit, Khawzawl leh Saitual District-a SP-te an tel a Central YMA hruaitute hi an President R. Lalngheta hovin an tel bawk a ni.