Manipur atanga raltlan rawn lut te chhawmdawlna tunkar-ah District tinah semchhuah beisei a ni

Manipur atanga sahimna zawnga Mizoram-a rawn tlan lut a awm mekte chhawmdawlna atana Finance Department-in cheng vbc. 5 a ruahman chu tunkar hian District tin Bawrhsap te kaltlanga semchhuah tan hman beisei a ni a. Tunhnaiah raltlan rawn lut tlemin chhungte belh tur nei lo raltlante chu RAY Falkland Veng-ah enkawl mek an ni.

Mizoram sawrkar-a Home Commissioner H. Lalengmawia sawi danin Manipur atanga sahimna zawnga Mizoram-a rawn tlanlut a awm mekte chhawmdawlna atana Finance Department-in cheng vbc. 5 a pekchhuah hi Administrative approval leh Expenditure sanction tihfel a nih hnuah District Bawrhsap hrang hrangin Manipur raltlante tana pawisa an lo hman tawh dante an thehlut a. Chumi zulzui leh raltlan tam dan a zirin pawisa hi semchhuah tur a ni dawn a ni. Hetihlai hian May ni 23-a Chief Minister Zoramthanga’n sawrkar laipui-a Manipur atanga raltlan Mizoram a awmte enkawlna atana cheng vbc. 10 a dil chu pek a la ni lo thung. Hetihlai hian tunhnai khan Mizoram Health Department chuan damdawi leh a kaihhnawih cheng nuai 5 chuang hu chu Churachandpur District Hospital-a hman turin a thawn a, heng zingah hian Kal tha lo enkawlna (dyalysis) hmanrua cheng nuai 2 chuang man a tel bawk a ni.

Manipur tualchhung buaina avanga sahimna zawnga Mizoram-a rawn lut hi tunhnaiah tlem deuhin damlo inenkawl tur te, phai lam pan tum leh engemaw avanga lo chhukte erawh an awm zeuh zeuh a, amaherawh chu kar hmasa ah Imphal phai depah inkahna a awm leh avangin Ningani zan atanga Zirtawpni inkar khan raltlan 246 an rawn luh belh leh thung a. Heng te nen hian Zirtawpni tlai dar 5:00 thleng khan Manipur atanga sahimna zawnga Mizoram a awm mek hi mi 12,880 an tling tawh a, an zinga mi 9,899 te chuan an chhungkhat laina leh thiante an bel a, mi In luaha khawsa an awm bawk a, mi 2,981 te chu Relief Camp 38-ah an awm mek a ni. Raltlan hi District tinah awm mekin Aizawl District-ah tam berin mi 4,518 an awm a, Kolasib District-ah mi 4,443 awmin Saitual District-ah mi 2,951 an awm mek bawk a. Hnahthial District-ah an tlem ber a, mi 8 an awm a ni.

Mizoram-a raltlan zingah Manipur lama let tlem an awm a, thenkhat chu let ngaihna awm tawh lo an awm bawk a. Heng mite hi an In leh lo an hal chhiat sak leh Meitei hovin an luahsak te an ni a. Raltlan lette hi Lamka leh a chhehvela mite nia thudawn a ni.

Central YMA-in Manipur raltlante chawlh lailawkna tur hmun, Transit Centre an siam pawh August 12, 2023 khan kharin, an enkawl mekte hi RAY, Falkland-ah sawnluh an ni a. YMA Transit Camp-ah hian a vaiin mi 800 vel enkawl hman an ni a, Transit Camp hi tihtawp ni mah se harsatna tawk, Mizoram pante erawh YMA hian an lo buaipui zel thung a ni. Mizoram sawr-karin raltlan a dahkhawmna, RAY, Falkland-ah hian raltlante chu Room 63-ah dah an ni.