India rama Land Customs Station 20 zinga Mizoram in 2 a chang lawmawm a tih thu Minister in a sawi

Commerce & Industries Department changtu Minister Dr. R. Lalthangliana chuan India rama Land Customs Station 20 te zingah Mizoram in pahnih kan chang thei chu kan economy tih hmasawnna tur atana thil lawmawm tak a nih thu a sawi.

Land Customs Station, Zokhawthar tih changtlunna tura project, 'Infrastructure Development for Border Trade Facilitation at Zokhawthar' hnuaia hna hrang hrang zinga pakhat, Officers' Quarters hawnna hun Inrinni-a neih ah Dr. R. Lalthangliana chuan, ramdang nena kan insumdawn tawnna tura hmalakna kal zelah Land Customs Station, Zokhawthar-ah ruhrel tha tak buatsaih belh a ni chu lawmawm a tih thu a sawi a. India ram a Land Customs Station 20 te zingah Mizoram in pahnih - Zokhawthar leh Zorinpui kan chang thei chu kan economy tih hmasawnna tur atana thil lawmawm tak a nih thu sawiin, Kawrpuichhuah lamah pawh hmalakna liantham taka kalpui mek anih thu a sawi a ni.

Dr. R. Lalthangliana chuan Zokhawthar leh a chhehvel chu Myanmar nena kan insumdawn tawnna hmunpui ber ala ni chhunzawm zel dawn tih pawh sawiin, tun dinhmunah SASCI kaltlangin cheng nuai 1500 hmanga hnathawh mek a nih thu leh hei hian kawng hrang hrangin hmasawnna ala thlen zel dawn thu a sawi a. He sumdawnna hmunpui ti hlawhtling tur hian Zokhawthar leh a chhehvel mipuite hmalak puiah a sawm bawk.

He hunah hian khual zahawm leh Champhai South bialtu MLA TJ. Lalnuntluanga pawhin Bangladesh leh Myanmar ram te nena kan insumdawn tawnna ti hmasawn turin Sawrkar chuan theihtawp a chhuah zel thu sawiin, amah ngei pawh sawrkar hmalaknain Moreh Land Port, Manipur leh Tripura State-a Bangladesh border te tlawhin sumdawnna an kalpui dan te uluk takin an zirchian thu leh hemi chungchangah Sawrkar Laipui Ministry of External Affairs leh Ministry of Commerce te pawh an dawr thu a sawi a. Zokhawthar Border Trade chu kan economy innghahna hmunpui a la ni zel dawn tih sawiin, chumi tur chuan sawrkar pawhin ruhrel bun belh kawngah te, inkalpawhna siamthat kawngah te hma ala zel a, Taxi leh Auto Rickshaw te pawh service theiin ruahmanna siam fel a ni tawh a. Melbuk leh Zokhawthar inkar kawng siamthat nan SASCI sum cheng nuai1350 ruahman fel tawh a nih thu a sawi bawk.

Infrastructure Development for Border Trade Facilitation at Zokhawthar Project hi Special Assistance to States under Capital Expenditure/Investment (SASCI) 2020-21 fund cheng nuai 1500 hmanga thawh a ni a. Lushai Engineers, Ramhlun Aizawl ten hna thawkin, April 20, 2022-ah an tan a, thla 24 chhunga thawh zawh tur a ni. Officers’ Quarters hi cheng nuai 216 senga sak niin, 2BHK quarters paruk (6) sak a ni.