Hnahlan Winery-ah Grape Festival 'The Grape Escape' hman a ni

Hnahlan Grape Farming & Processing Coop Society (HGFPCS) Ltd. leh A North East Wave (NEW) Initiative-te tawngkawp buatsaih Grape Festival 'The Grape Escape' chu Inrinni khan Hnahlan Winery-ah neih a ni.

Grape Festival 'The Grape Escape' hi Champhai North bialtu MLA Dr. ZR. Thiamsanga chuan khuallian nia hawngin Hnahlan Winery-ah Grape Festival 'The Grape Escape' buatsaih a ni chu grape chingtu kuthnathawktute leh Tourism hmasawnna atana hmalakna ropui tak a ni tih a sawi a, kuthnathawktute eizawnna kawngah ah pawh hun lo kal zel turah nghawng tha tak a neih ngei a beisei thu sawiin, Horticulture, Argiculture, Rural Development leh Department dangte paw’n Grape chingtute an lo duhsak thinna ah lawmthu a sawi a, an hmalakna hrang hrangah lo pui zel thin turin a ngen sak bawk. Grape chin chu eizawnna a tlin thu pawh sawiin, Grape chingtu kuthnathawktute pawh thahnemngai taka hma lo la chhunzawm turin a chah a, an mamawhte ngaihven sak zel a tum thu a sawi bawk.

He hunah hian khualzahawm Ministry of Tourism-a Regional Director Anil Oraw pawhin The Grape Escape chu Mizoram-a Wine Industry leh Tourism lama hmasawnna pawimawh tak anih thu sawiin, Sawrkar Laipui Ministry of Tourism hnuaia India rama Tourism hmasawnna tura project lian tham, Swadesh Darshan 2.0 hnuaiah Champhai District-ah Wine Tourism kalpui anih tur thu leh sum pawh sanction fel anih tawh thu a puang bawk.

Hnahlan Winery Winemaker Catherine Rosangzuali chuan Technical Report pein Hnahlan Winery chu kum 2007 ah bultan a nih thu sawiin, Hnahlan leh a chhehvel khuaah te Bangalore Blue Grape Variety an ching tih a sawi a. A tirah chuan Fortified Wine siam niin tun dinhmunah hian Fermented Wine, Isabella an siam chhuak a. Kum 2019 khan Grape quintal 480leiin kum 2020-ah quintal 630, kum 2021-ah quintal 500, kum 2022-ah quintal 1500 leh kumin 2023-ah quintal 989 leiin wine-ah an siamchhuak tih a sawi a. Hnahlan Winery-ah hian Fermentation Tank 22 (11,000 litres theuh) awmin a vai-a a dawn tam lam chu litre 2,42,000 a ni a, grape quintal 200 lenna Cold Storage an nei bawk a ni.

SEDP sum kaltlanga ruahman he hunah hian kum 2019 -2023 chhunga Hnahlan Winery a Grape hralh hnem te hnenah Farmers Award sem niin C. Lalrampara chu pakhatna a ni a, C. Vanlalhriata leh V. Lalthlamuana ten dawtin intihhlimna chi hrang hrang nen hun hman zui a ni.