Hnahthial-ah Youth-20 Meet neih a ni

Sports & Youth Services Department leh Mizo Zirlai Pawl (MZP) tangkawp buatsaih ‘Youth-20 Meet on Nationalism, Patriotism and Development’ chu nimin khan Hnahthial-ah neih niin Higher & Technical Education Minister Dr. R. Lalthangliana chuan khuallian niin a hmanpui a ni.

Hnahthial Electric Veng Community Hall-a he hun hman ah hian Dr. R. Lalthangliana chuan G-20 hnuaia hmalakna peng pawimawh tak pakhat, thalaite tana Youth-20 buatsaih a ni chu lawmawm a tih thu sawiin, Zo nunze mawi tak chu tlawmngaihna a nih thu leh Hnamdangte pawhin an ngaihsan a nih thu a sawi a. Tlawmngaihna tih tawngkam chu tawng dang ah a tlukpui a awmlo nia sawiin, “Sawifiah rualloh thiltiha lantir thin zawk a ni,” a ti bawk.

Dr. R. Lalthangliana chuan Nationalism awmzia chu Hnam rilru put ringawt nilovin, ram leh Hnam tana penchhuah a, a taka Zo nunze mawi nunpuia, chet chhuahpui a ni tih sawiin, mahni mai bakah midang lainatna leh ngaihsaknate chu Hnam hmangaihna dik tak a nih thu a sawi bawk.