GSWSS Phase-II atana ram mamawh theih tur en ho
PHE Serchhip WATSAN Division-a Executive Engineer, Er. Isaac Lalchhuanmawia chuan PHE Department in Serchhip mipuite tana tui sem hna an kalpui mekah tun dinhmunah harsatna an neih loh thu leh amaherawh chu Phase-II siam tur chuan inbuatsaih chhung leh Project buaipui chhung te a rei avangin tun atanga lo buaipui chu a tul thu a sawi a. Tunhnaiah an Department hotu lian zawk ten hemi atan hian Concept Paper lo buatsaih tura an tih thu leh an Concept Paper hi a taka hman theih a nih hunah pawh harsatna a awm lohna turin an ram mamawh turte chu tun atanga lo en lawk an ni tih a sawi.
PHE Department hotute chuan tuna Ser-chhip khawpui chawmna atana Khawtetlang-a Tuizem lian an hman mek chu litre nuai 11 lenna a nih thu leh hetiang tur hian Tuizem a lai hawlhtlang-a meter 20 vel an mamawh thu leh hei bakah hian Control Room dinna tur an mamawh tel tur thu an sawi a. Tuna an chhut danah chuan ni khat-ah mi pakhat in tui litre per capita per day (lpcd) 70 mamawh ang a nih thu leh ruahmanna thar ah chuan 135lpcd tur a nih thu sawiin, hei hi kum 30 chhung rin theih tura hisap a nih thu an sawi a. Ruahmanna an neih dan te pawh an sawifiah bawk a ni.
PHE Department hotute hian he hmalakna bawhzuina atan hian nimin khan Tarpi Tlang leh Ser-chhip Vengchung ram te hi an enfiah a, a ram neitu lamah harsatna a awm lo a nih chuan hemi zulzui hian Concept Paper hi an siam dawn thu an sawi a, ram neitute pawhin inrawnkhawmna an neih tur thu an lo sawi bawk a ni. Nimin-a heng ram an enfiahna ah hian PHE Department hotute bakah a bialtu Village Council leh ram neitute pawh an tel a. MNF General Hqrs. a Publicity Board Vice Chairman J. Malsawmzuala Vanchhawng pawhin heng hmun te hi a enpui bawk a ni.
Comments
Post a Comment