District hrang hrangah ram zalenna ni hman a ni

Ramchhung hmundangte rualin Mizoram hmun hrang hrangah nimin khan India in Zalenna a hmuh kum 77-na chu lawm a ni.

Mizoram-a Independence Day lawmna pui ber Aizawl Sipai Lammual-a neihah Chief Minister Zoramthanga'n Hnam Puanzar pawtpharhin Parade Contingent-te chibai buk a chhanglet a. Parade Contingent hrang hrang 27 awmin heng zingah hian Armed leh Un-Armed Contingent 6 ve ve awmin School contingent 12 an awm a, Band Prty 3 an tel bawk. Chief Minister chuan mipuite hnenah thuchah sawiin, sawrkar hnathawk tha hrang hrangte chawimawina a hlan a. Union Home Minster’s Medal for Excellence in Investigation, 2023 chu Lalnuntluanga, Sub-Inspector, Lunglei Police Station hnenah hlan a ni bawk. 

Independence Day vawi 77-na hi Deputy Chief Minister Tawnluia chuan Khawzawl Mualvawm Field-ah hmanpuiin Hnam puanzar pawt pharhin Parade Contingent 19 te chibai a chhang let a. Khawzawl District mipuite leh ram puma India khua leh tuite duhsakna chibai a buk a. Khawzawl District puan anih atanga hmasawnna hnathawh hrang hrangte sawiin, mipuiten District an duh chhan Vawiin-a tihhlawhtlin zel a ni ta chu lawmawm a tih thu a sawi bawk.

Lunglei-ah chuan Thuamluaia Mual-ah Agriculture Minister C. Lalrinsanga hovin Independence Day hi hman a ni a, Minister hian Hnam puanzar pawt pharhin Parade Contingent 27 te endikin, Hnam Panzar chibai an buk a chhang let bawk. He hunah hian kawng hrang hranga National leh State Level-a Lunglei District atanga Award dawngte chawimawina hlan an ni a, MGNREGA hnuaia Amrit Sarovar Mission hnuaia Dil siam tha te hnenah chawimawina hlan a ni bawk. Heng bakah hian District Level Award to Meritorious and Outstanding Teacher 2023 chu ZD. Lalramliani (Teacher, Govt. Leitlangpui H/S) hnenah hlan niin 3rd Bn. Naga Hill Assam Rifle ten rualbanlo mi 14 te hnenah Wheelchair, Worker, Crutch an sem bawk a. Sub-Inspector Lalnuntluanga'n Union Home Minister Medal for Excellency in Investigation lawmman a dawn thu puanchhuah a ni bawk.

Siaha-ah chuan District Playground, Vaihpi-ah Social Welfare Minister Er. Lalrinawma hovin Independence Day hi hman a ni a, Minister hian India hnam puanzar pawtpharhin Parade Contingent 18-in zahna chibai an hlan a chhanglet a, mipuite hnenah thuchah a sawi bawk.

Lawngtlai-ah chuan Mizoram Legislative Assembly Deputy Speaker H. Biakzaua hovin Central YLA Playground-ah ram zalenna ni champha hi hman a ni a, khuallian hian Parade Contingent 28 te chibai buk chhangletin chawimawina chi hrang hrang semchhuah a ni bawk.

Kolasib-ah chuan Supply Minister K. Lalrinliana hovin India Independence Day hi hman a ni a, Kolasib Sports Stadium-ah Minister hian Hnam Puanzar pawtparhin Parade Contingent 19 te Chibai buk a chhanglet a, mipuite hnenah thuchah a sawi bawk a ni.

Champhai-ah chuan Transport Minister TJ. Lalnuntluanga hovin Chhangphut Field-ah hman a ni a, Khuallian hian Hnam Puanzar pawtparhin, Parade Contingent 30-te Hnam Puanzar chibai bukna a chhanglet a; thuchah a sawi hnuah Parade intihsiakna a ti thate leh Independence Day puala Sports Association-te intihsiakna hrang hranga tithate hnenah lawmman a hlan bawk.

Mamit-ah chuan Sports Minister Robert Romawia Royte hovin ram zalenna ni champha hi GSA Playground-ah hman a ni a, Minister hian Hnam puanzar pawtpharhin Parade Contingent 15-te chibai buk a chhanglet a. Nasha Mukt Bharat Abhiyan (Drug Free India Campaign) chu Mamit District tan a hawng nghal bawk.

Hnahthial-ah chuan Health & Family Welfare Minister Dr. R. Lalthangliana hovin HDFA Turf Ground-ah India Independence Day hi lawm a ni a, Minister hian India Hnam Puanzar pawt pharhin Parade Contingent 10 te chibai a chhanglet a, mipuite hnenah thuchah a sawi bawk. He hunah hian Zirlaite tana Essay inziahsiak lawmman sem a nih bakah EF&CC Department bultumin kangmei chhuak tur venna kawnga hma la tha khua te hnenah lawmman, Fire Prevention Award sem a ni bawk.

Saitual-ah chuan P&E Minister R. Lalzirliana hovin India Independence Day hi lawm a ni bawk a, Keifang Centenary Sports Complex-a hun hman ah Minister hian Hnam Puanzar pawtparhin Parade Contingent 16 te chibai buk a chhanglet a, Saitual District tana sawrkar hmalakna hrang hrang a tarlang bawk.