Bunghmun BDO Site Office ngiatin BDO an dang

Bunghmun khawtlang chuan Lunglei-a ‘Bunghmun BDO Site Office’ dah tihtawp phutna atan nimin khan Bunghmun BDO in an khua a chhuahsan tur chu an dang.

Thulakna in a tarlan danin Bunghmun-ah hian BDO Office tha tak awm mah se Lunglei-ah Site Office an neih avangin BDO leh thawktute chu Lunglei-ah an awm deuh chawt a, BDO hian a khat tawkin Bunghmun hi a tlawh zeuh zeuh a, BDO Staff te phei chu Republic Day leh Independence Day dawn ah bak an hmu ngai meuh lo a. BDO thuthmun ni siin BDO nei lo ang maiin an awm thu leh BDO dawr turin Lunglei-ah anmahni kal a ngai thin niin an sawi a ni.

Tuna Bunghmun a BDO hna chelh mektu hi kumin April 28 khan Bunghmun BDO atan dah niin ani hian Site Office hi tihtawp tumin hma a la a. Hetihlai hian July 28, 2023 khan transfer lehnghal niin nimin-a Independence Day a hmanpui zawha chhuak tur a ni a. BDO hian nimin a Independence Day an hman zawhah Bunghmun chhuahsan tumin hei hi mipui te chuan phal lovin an dang a. BDO Site Office tihtawp a ni dawn a nih loh chuan Bunghmun khawtlang chuan dan rih an tum a ni. Bunghmun khawtlang hruaitute chuan Lunglei DC-te be pawp tawhin, an thil duh an thlen tawh a, BDO Site Office tihtawp ngei a nih theihna atan Bunghmun khawtlang chuan hmalak zel an tum thu an sawi bawk a ni.