Hmasawnna tak tak kan neih theihlohna Pathian thu kan awih tawk loh vang a ni - Agriculture Minister

Agriculture Minister C. Lalrinsanga chuan Pathian zawnchhuah ni si a, tun thlenga hmasawnna tak tak kan neih theihlohna chu Pathian thu kan awih tawk loh vang a ni tih a sawi.

Mizo Students' Union (MSU) Regional Hqrs. Lunglei in Lunglei District atanga zirlai titha (Under Graduate Rank Holder) te lawmpuina hun nimin-a Lunglei Saikuti Hall-a an buatsaih a hmanpuina ah Agriculture Minister C. Lalrinsanga chuan Academic ringawt chu ram dinchhuahna a ni lo tih sawiin, “Pathian zawnchhuah ni si a, tun thlenga hmasawnna tak tak kan neih theihlohna chu Pathian thu kan awih tawk loh vang a ni,” a ti a. “Nationalism kan tih hian rinawmna leh taimakna a keng tel tih kan hriat a tul a. Kan ram a kan tih ve theih reng kan tihloh avangin ramdangah sum tam tak kan pechhuak a, hetiang anih laia sawrkar hna ringawt thawh kan tum te hi kan in enfiah a hun a, ram in a mamawh leh mahni a kan intodelhna tur kawng zawh nachang kan hriat a ngai a ni,” a ti bawk a. Hnam changkang kan tih te hi sawrkar hna aia mahni kutkawih hmanga eizawnna uar hnam an nih vang a nih thu pawh sawiin, chutianga mahni a eizawnna kawng dap kawngah rilru zau tak put a ngaih thu a sawi bawk.

Nimin-a Under Graduate Rank Holder lawmpuina thilpek an pek te hi an vaiin mi 37 an ni a, Higher and Technical Institute of Mizoram (HATIM) atangin 8 , Pachhunga University College atangin 9, Lunglei Govt. College atangin 8, Govt. Hrangbana College atangin 3, Govt. J. Buana College atangin 1 leh Faith College atangin 1 te an ni.

Heng bakah hian Post Graduate a pass tha 5 leh B.Ed 2 te hnenah lawmpuina thuziak hlan niin Mizoram State Teacher's Award 2023 lawmman dawngtu F. Lalhmangaihthanga, Headmaster Govt. High School Lunglei leh Mizo Students Union Regional Headquarter, Lunglei hruaitu nilai zinga pass tha mi 2 te bakah kum 2021-2023 chhunga hruaitu lo ni tawh pahnih te hnenah lawmpuina hi hlan an ni bawk.