Champhai-ah Youth 20 Mizoram Meet neih a ni

Nimin khan Govt. Champhai College Multipurpose Hall-ah Sports & Youth Services Department leh Mizo Zirlai Pawl (MZP) te tangkawp buatsaih 'Youth 20 Mizoram - Meet on Nationalism, Patriotism & Development' tih thupui hmanga zirlai intawhkhawmna neih a ni.

Nimin-a he hun hman hi Law Minister TJ. Lalnuntluanga chuan khuallian nia hmanpuiin thupui pawimawh tak hmanga Mizo thalaite tan Youth 20 Meet buatsaih a ni chu lawmawm a tih thu leh he hmalakna hian ram leh hnam humhalh leh hnam inpumkhatna pawimawh zia kan thalaite thinlungah a tuh ngei a beisei thu a sawi a. Hnam changkang leh ropui apiangin an hnam an dah pawimawhin an ngaihsan thin thu sawiin, zirlai kalkhawmte chu mahni zawn theuhah hnam chawimawitu nih tum thin tur leh hnamdang nupui pasal nei lo turin a ngen a. State dang leh ram danga cheng Zohnahthlak unaute ngai pawimawha, an thlavang hauh kawngah pawh kan tanrual chhunzawm zel a tulh thu a sawi bawk.

Youth 20 Mizoram - Meet on Nationalism, Patriotism & Development hi Aizawl, Kolasib, Saitual leh Khawzawl -ah te neih ni tawhin Mizoram District tinah neih tura ruahman a ni.