Aizawl-ah man chawi-a tui dawhna leh hmankhat daih plastic tui um tihriralna hawn a ni

Aizawl khawpui hmun hrang hranga man chawia tui in tur thianghlim dawhna ‘Roadside Drinking Water Kiosk’ leh hmankhat daih plastic tui um tihriralna ‘Reverse Vending Machine’ dah te chu nimin khan Deputy Chief Minister Tawnluia chuan a hawng.

Aizawl Smart City hmalaknaa a ‘Roadside Drinking Water Kiosk’ leh ‘Reverse Vending Machine’ te hawnna puala inkhawm tawi SAD Conference Hall-a neih ah Deputy Chief Minister chuan heng khawl pahnih te hi Aizawl khawpui leh a chhunga chengte tan thil thar, tunhmaa la awm ngai lo, remchanna changkang tak mipuiin an chhawr tangkai theih tur ruahmanna a nih dante a sawi a. Reverse Vending Machine phei chu tui inna plastic um ruak mi in an paih mai mai thin senghawi leh sawngbawlna kawngah min puih theih a rin thu sawiin, mipuiin kan hman tangkai zel chhoh chuan Aizawl khawpuiin faina leh thianghlimna kawngah hma kan sawnna a ni thei dawn a ni, a ti.

Nimin-a hawn tak Man chawia tui intur thianghlim dawhna khawl, ‘Roadside Drinking Water Kiosk' hi Aizawl Ceng hrang hrang leh hmun pawimawh 24 ah bun a ni a. Cheng khat thir in tui ml 500 leh cheng hnih thirin tui litre khat a lei theih a, a tui hi UV filteration hmanga he khawl chhunga awm khawl hrang hrang 3 in a tihfai hnua lo chhuak a ni.  He khawl hian tui litre 120 vawikhatah a stock thei a, a sirah LED display a awm bawk a ni.

Hmankhat daih Plastic tui um ruak tihriralna ‘Reverse Vending Machine’ hi Aizawl veng hrang hrang leh hmun pawimawh tiamin hmun 17 ah dah a ni bawk a. Bur ruak nawrhluhna awmin, bur ruak chu khawlin a chhungah a chep nawi a. Buar ruak nawrluh hnuin coupon hman tangkai theih a rawn chhuak thei dawn a. Bur ruak gram 80 aia rit chu khawl in a la lut lova, a rawn nawrchhuak a. Plastic a cheh nawi hi bawlhlawh sawngbawl pawl, No Waste in kg khat cheng 5 zelin an lei dawn a, tumkhata plastic cheh nawi kg 20 khawl theiin a sirah LED display a awm bawk a ni.

Deputy Chief Minister hian MINECO Main Gate bul kawngsira chawhmeh zuarte tana Aizawl Smart City in a ruahman dawhkan changkang ‘Street Vendors Modular Kiosks’ chu a hmangtute hnenah a hlan nghal bawk a. ‘Street Vendors Modular Kiosks’ hi Steel tha chi leh darthlalang-a siam niin pawhdawh kalh theih pawh a awm tel bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man