ZUK LEH HMUAM LEH NAUPANG TE

ZUK LEH HMUAM LEH NAUPANG TE
(Nu leh pa mawhphurhna)

- C. Lalrempuia, Social Worker

National Tobacco Control Programme

Mizote hian vaihlo zuk leh hmuam kan ti/hmang nasa hle a. Global Adult Tobacco Survey 2015-2016 a neihin a tarlan dan chuan India ramah vaihlo hmang nasa ber pahnihna kan ni. Hemi piah lamah Global Youth Tobacco Survey 2019 a zirlai naupang te kum 13-15 inkar survey neihin a tarlan danin India ramah zuk leh hmuam hmang nasa ber kan ni mek bawk.

A chunga kan tarlan tak ang khian zuk leh hmuam hman kawngah kan sang hle a, hemi a nih avang hian nu leh pa ten kan fate zuk leh hmuam an hman lohna turin tan kan lak nasat a pawimawh hle a ni tih kan hriat thar a pawimawh.

Mithiam te chuan zuk leh hmuam hi ruihhlo hman tanna kailawn tiin an sawi hial a, kan fate ruihhlo laka an fihlim chhoh theihnan zuk leh hmuam hmang lo tur a kan kaihhruai thiam hi a pawimawh tak zet a ni.

Kan fate zuk leh hmuam lak a an fihlim theihnan nu leh pa te hian tihtur tam tak kan nei ve a, chung zinga thil pawimawh thenkhat te chu kan rawn tarlang dawn a ni -

1. Nu leh pa ten zuk leh hmuam kan hman kan sim thei lo a nih pawhin naupang te dawrah zuk leh hmuam lei tur a tirh loh tur a ni.

2. Loh theih loh a zuk leh hmuam kan ti/hmang a nih pawhin a ruk thei ang berin kan fate hmuh lohin kan hmang thin tur a ni.

3. Nu leh pa ten mei kan zu thin a nih pawhin kan chhungkua secondhand smoke lak a an lo fihlim theih nan pawn lam a inthiarfihlim nachang hriat hi a pawimawh takzet a ni.

4. Chhung inkhawm kan neihnaah te zuk leh hmuam that lohna te sawi tam a pawimawh khawp mai.

5. Supari hrang hrang (Sweety, Sachin, Dildar etc) an ei atang hian Gutkha lamah an pakai thei a ni tih hriat a hetiang lam ei lo tur a zirtir a tha.

6. Kan fate an dawldang a, an chaw ei a tui lo leh luhai te an nei a nih chuan Gutkha an ei vang a ni thei tih hriat a zawh chian a, Gutkha ei an lo chin chuan sim tir a tha.

Kan ram hmachhuan kan tu leh fate hi an hmalam hunah an lo hrisel zawk theihnan zuk leh hmuam lak a venhim hi nu leh pa te mawhphurhna a ni tih hria in midang kut a dah mai lovin zirtirna kan pek fo hi a tul tak zet a. Zuk leh hmuam sim hian tlai luat a nei lova, hriselna kawngah nasa takin kan thatpui thei reng a ni tih hria a sim ngei hi a tha ber a ni.

Zuk leh hmuam sim duh tan District Hospital hrang hrangah Tobacco Cessation Clinic (TCC) an awm a, in lo pan ve ngei dawn nia.

Comments

Post a Comment

Popular News (Last 30 Days)

Vawiin-ah HSSLC Exam result

LPG man bithliah thar