Health Minister in Award lawmpuina hlan

India ram-a Nurse chawimawina sang ber ‘National Florence Nightingale Award’ kumin a Mizoram atanga dawngtu Aizawl Dinthar Veng-a cheng C. Zopari chu Health Minister Dr. R. Lalthangliana chuan nimin khan a Pisa-a leng-ah sawmin chawimawina thuziak leh tangkafai a hlan.

Health Minister chuan Mizo zinga National Florence Nightingale Award dawng kan nei thar leh chu a lawmawmin a ropui takzet tih sawiin, Nurse te chu midangte tana inpe leh malsawmna ni chhunzawm zel turin a chah a, C. Zopari chawimawina dawn hian midangte cho phur se a duh thu a sawi bawk. National Florence Nightingale Award dawngtu C. Ropari pawhin Mizoram sawrkarin an lawmpuinaah lawmthu sawiin, thingtlanga a hun tam zawk a thawh thu leh hmun hla, damdawi awm mumal lohna hmunah pawh a theih ang anga tan a lak thin dan te a sawi a, ama sum pawh seng hiala damlo enkawlna kawnga tan a lak dante, damlote mamawh damdawi a awm loh chang pawha hma a lak thin dante tarlangin, tupawh hian kan hna theuh hi tui taka kan thawh chuan kan rin phak bak hian a rah tha kan seng thin a ni, a ti bawk.

Nurse hnathawk thate chawimawina 'National Florence Nightingale Award' hi kum 1973 atanga kalpui niin Mizoram Nurse 15 ten an dawng tawh a ni. He Award hi Nurse zirtirtute, damlo enkawla Hospital-a thawkte leh Public Health-a thawk ANM-te tan dil theih vek a ni.