Wildlife Rescue Centre din tuma hmalak mek a ni

Environment, Forest & Climate Change (EF&CC) Minister TJ. Lalnuntluanga chuan Wildlife Rescue Centre din tuma hmalak mek a nih thu a sawi.

Champhai Tlangsam Dumpui tlang-a Satellite Wildlife Rescue Centre dinna tur hmunhma leh a panna kawng nimin-a a enfiahna ah TJ. Lalnuntluanga chuan Champhai District kaltlangin dan lova nungcha tawlhruk thahnem tak man a nih tawh thu sawiin, Central Zoo Authority of India inkaihhruaina dan siamin Sahuan pangngaia dahluh mai a remti lova, hei vang hian Court rorelna leh Enforcement Agencies dangte'n nungcha tawlhruk an mante chu dah maina tur a awm loh avangin an awmna tur bik Wildlife Rescue Centre din tuma hmalak a ni tih a sawi a. Satellite Wildlife Rescue Centre dinna tur project siamte sawrkar laipuiin a pawm tawh thu tarlangin, Financial Sanction pek thuai a nih theih nan Ministry lamin August thla tirah Technical Committee paltlang tura chhawpchhuah an tum thu a sawi bawk. Dan lova nungcha kawl leh tawlh mante dahna tur leh enkawlna tur Satellite Wildlife Rescue Centre dinna tur hian Tlangsam khaw bul Forest Department hnuaia awm Dumpui tlang ram hectare 20 vela zau chu ruahman a ni.