Fate buaipuia kan zinna thu Congress party ka hrilh zelna chhan tur ka hre lo - Lalduhoma

ZPM Leader Lalduhoma chuan, “Fate buaipuia kan zinna thu hi Congress party hi ka hrilh zelna chhan tur ka hre lo,” a ti.

Nimin-a ZPM Chhung Inkhawm neih ah ZPM Leader Lalduhoma chuan Party dangten ZPM an beihna hrang hrangte chu thu belhchian dawl lo a nih thu a sawiin, “Tunlai hian kan party leh BJP min sawizawm tum tlat an lo awm leh ta,” tiin a sawifiah a. India ramah Secular Force a lo pian a, MP inthlan leh hunah BJP kan paih theihna tura theihtawp lo chhuah tawh leh chhuah zel tur an ni tih sawiin, “Kumin MLA inthlan lo awm turah hian tumah thawhpui kan tum lova, lo tum pawh ni ila midang sawisak kan ngai lo. Delhi chaknaa innghah kan tum lova; Kan innghahna chu Pathian a ni. ‘Chakna ni lovin, thiltihtheihna ni lovin ka thlarau zawkin le’ tih hi kan innghahna a ni,” a ti a. Tunhnaia Guwahati-a a kal leh BJP nen inhmu-a puhna chungchangah, “Fate buaipuia kan zinna thu hi Congress party hi ka hrilh zelna chhan tur ka hre lova, BJP chungchang an hriat duh chuan an thawhpui MNF te hi zawt mai se tih hi ka rawn duh a ni,” a ti. Tunhnaia an party atanga hruaitu chhuak ta te chungchang pawh sawiin Lalduhoma chuan, “Kan ui hle a, candidate atan pawha kan iai loh tak tak an ni. Kan bawm a tawt si avangin an beisei ang kan tihsak thei lova, tuman i vawm zui lovang u. An awmna party tharah pawh kalphung thar lo va hmang zel se tiin ka chah duh a ni,” a ti bawk.