Union MoS for Agriculture in Champhai a tlawh

Mizoram tlawha rawn zin mek Union Minister of State for Agriculture & Farmers' Welfare Shobha Karandlaje-i chuan nimin khan Champhai thlengin sawrkar hotute a kawm bakah hmalakna hrang hrangte a tlawh nghal bawk.

Union Minister Shobha Karandlaje-i hian Lengpui Airport atanga Helicopter hmanga Champhai hi thlengin District Bawrhsap James Lalrinchhana, SP Lalrinpuia Varte leh Official dangte'n an lo dawngsawng a, hemi hnu hian Circuit House Conference Hall-ah sawrkar hotute leh khawtlang hruaitute nen thutkhawm nei nghalin Sawrkar laipui scheme pawimawh tak takte'n khua leh tui, a bik takin a tinzawn leh dawng thei tura ngaihte hnen a thlen kim theih nana tanlak tlan a tul thu leh hei hi Prime Minister duhdan pawh a nih thu a sawi a. Department hrang hrangte inkarah thawhhona tha vawnnun tlat a pawimawh thu sawiin, ram pum hmasawn turin India ram hmun hrang hrangah hmasawnna a thlen a ngai a ni, a ti a. Official-te chu an department kaltlanga Scheme awmte zirchianga hre bel tur leh a nihna ang tur taka kalpui a nih theih nana tan la sauh sauh turin a chah bawk.

Union Minister chuan NE State te'n scheme pawimawh hrang hrangah 90% subsidy an dawng chu vanneihthlak a tih thu sawiin, hengte hi hriaa tha taka Scheme hlenchhuah a tul thu a sawi a. CSS khawih Department hotute chu harsatna awmte leh bawhzui tul angte ziaka a hnena thlen tura chahin, a tul angte Sawkar laipui lamah lo ngaihven sak a tum thu a sawi a. Loneitute chu India ram ei leh bara chawmtu an nih avangin sarkar laipuiin a ngaipawimawh gle a ni, a ti bawk.

Union Minister State for Agriculture & Farmers' Welfare hian nimin chawhnu lam khah Champhai leilet zawl tlawhin Farmer Interest Group member-te a kawm a. Leilet enkawltute chuan Champhai leilet-a kumtluana buh leh thlai dangte chin a nih theih nana tui hnianghnar zawk neih theih nana Water Harvesting Dam siam te, Tuipui lui lian avanga harsatna hrang hrang awm thei leh a venna tur siam chungchangte leh leitha duh khawp hman tur a awm theih nana hmalakpui turin an ngen a. Line Department Official-te chu leilet neitute harsatna hre renga DPR siama sawrkar laipuia thehlut turin a chah bawk.

Hemi hnu hian Pradhan Mantri Matsya Sampada Yojana (PMMSY) kaltlanga cheng nuai 15 senga Sangha chi tharchhuahna 'Construction of Freshwater Finfish Hatchery Unit', Tlangsam ami tlawhin Champhai Grape Growers Society-te enkawl Champhai Winery, Tlangsam tlawhin Grape sawr bultanna hun a hmanpui a, Non-Lapsable Central Pool of Resources (DoNER) sum cheng vbc. 19.88 senga PHE Department siam Keilungliah tuikhuah an siam pawh a tlawh nghal bawk.