Tribal Art & Craft, Young Artist’s Sustainable Development kharna Minister hovin neih a ni

Social Welfare & Tribal Affairs Department leh Aizawl Art Gallery te tangkawpin thalai te tana lemziah huang programme ‘Tribal Art & Craft, Young Artist’s Sustainable Development’ tih thlakhat chuang an buatsaih kharna chu nimin khan neih niin SW&TA Minister Er. Lalrinawma chuan khuallian niin a hmanpui a ni.

Aijal Club-a he hun hmanna ah hian SW&TA Minister chuan art tih mai hian lemziah piah bakah thu leh hla literature te, rimawi te leh hnam ziarang thil thlengin a huam nia a ngaih thu sawiin, “Art hian a huamzau a, Mizo khawtlang nunah phei chuan zai leh hla bakah rimawi ten dinhmun sang tak changin kan ngaihlu in kan rilru a hneh hle a ni,” a ti a. Tunlai thangtharte zingah Mizo pipu thawnthu zirtir tha tak tak nei te hria leh chhiar an tlem hle nia a hriat thu sawiin, “Kan pipute thawnthu kha a ropui a, kan thalai leh thangthar ten heng thawnthu te hi kan hmelhriat mai nilovin kan hlut a tul,” tiin heng te hi kan hlut thiam chuan hnam ziarang chawikanna leh humhalhna a ni tel zel niin a sawi.

Tribal Art & Craft, Young Artist’s Sustainable Development hi Ministry of Tribal Affairs bultuma neih thin a ni a, a tum ber chu Tribal thalaiten an hnam ziarang leh chanchin te lemziah leh thil siam hmanga an lantir leh phochhuah thei nan remchanna siamsak a ni. He programme hi Aizawl Art Gallery in an buaipui a, thalai art lama tui mi 67 a inziaklut a, thlakhat chhungin art lama mithiamten an enkawl chho a ni.