CM in Manipur buaina a ngawihsan thei lo tih sawi

Chief Minister Zoramthanga’n Manipur tualchhung buaina ah Zohnahthlak tam tak an tel thu sawiin, a chipuite tuarna chu a tuarna a nih miau avangin a ngawihsan thei lo tih a sawi.

He thu hi nimin khan Chief Minister hian a Instagram-ah tarlangin, Manipur buainaah mi tam takin nunna an chan tawh a, thisen tam tak a luangral tawh a, hliam tuar leh sahimna zawnga hmun dang pan mi tam tak an awm belh zel bawk a, Zohnahthlak tam tak te tuarna chu a tuarna a nih ve a vangin a ngawihsan mai mai thei lo tih a tarlang a. Kumin May thla tira Manipur-a buaina chhuak chu nimin thlenga reh lovin ni 62-na a ni tawh tih a tarlang a. Buaina a ziaawm zel an beisei laiin a punlun zel tih sawiin, a reh hun tur hriatthiam harsa tak a ni tawh, a ti a; Manipur buaina avanga hliam tuar leh nunna chan te, In leh lo chante leh buaina avanga harsatna hrang hrang tawkte a tuarpui takzet tih a sawi bawk.

Chief Minister Zoramthanga chuan Sakhaw hmun serh Biak In hal leh khawih chhiat te, tualthahna leh buaina nghawng tawrhna rapthlak tak thlalak leh video te chu hmuh belh tur awm tawh lo se a duh thu sawiin, buaina chinfel dan chu kawng khat chauh a awm a nih pawhin chingfel tura hma lak nghal ni se tih chu a duhdan a nih thu a sawi a. Nunrawng taka nunna in laksak leh insawisakna thleng chu a demawm thu sawiin, buaina chinfel dan kawng awm apiang dapin, a rang thei ang bera ngaihtuah a ngai tak zet tawh thu leh Remna leh muanna a awm thuai theih nan kawng zawn nghal chu a duhdan anih thu a sawi.

Chief Minister chuan Manipur buaina avanga sahimna zawng Mizorama rawn tlan lutte chu Sawrkar chhinchhiah danin mi 12000 chuang an ni tawh tih tarlangin, Manipur, Myanmar leh Bangladesh atanga raltlan, Mizoram Sawrkarin a lo tuamhlawm leh enkawl zat hi mi 50000 chuang an ni mek bawk tih a sawi a, heng raltlante leh sahimna zawnga Mizorama rawn tlan lut te enkawlna leh chhawmdawlna tur Central Sawrkar atanga puihna kan dil chu a rang lama pek thuai chu an duhdan anih thu a sawi bawk.

Mizoram Kohhran Hruaitute Committee (MKHC) pawhin Manipur-a chi leh chi inkara buaina chhuak chu pawi an tih takzet thu te, Sakhaw hmunhma te, Biak In leh kohhran bungraw hrang hrang te inzahsak lo taka tihchhiat a ni chu an dem a, thleng tawh lo se an tih thu an sawi ve bawk a. Remna leh muanna a lo awm leh thuaina turin rang tak leh chak taka hma la turin thuneitute, Central sawrkar, State sawrkar leh pawl hrang hrang hruaitute an ngen a. Kohhran hrang hrang te’n mahni theih ang anga he buaina avanga In leh lo chan te, ei leh bar tlachhamte leh himna zawnga raltlante an chhawm dawl chu lawmawm an tih thu pawh an sawi bawk.