Tlabung mipui lungawilo Aizawl-ah an pungkhawm

National Highway 302, Lunglei to Tlabung siam meka hnathawktute hmalakna an duhkhawp loh avangin Tlabung Village Council leh Tlabung Welfare Committee, Aizawl bultumin nimin chhun khan Tlabung mipui engemaw zat chu kawng siam hnathawh enkawltu NHDCIL Office kawt, Tuikhuahtlang-ah an pungkhawm.

Pungkhawmna-a telte chuan lungawi lohna thuziak chi hrang hrang kengin, Lunglei - Tlabung kawng chu kum hnih hnuah pawh a la chhiat thu te, Eng anga nasain action lain, tharum thawh pawhin innek mah se an thiam loh nia an hriat tawh loh thute an sawi bawk. Pungkhawm zinga thenkhatte chu NHDCIL hotu Office-ah lutin, an lungawi lohna hrang hrangte an thlen a, a Office bangah National Highway 302 siam mek thlalak an ken te an tar bawk a ni.

Thudawn danin National Highway 302 sial that leh laih zauh hna hi hlâwm hnih - Package A leh Package B-ah then niin, Package A hi June 30, 2021 khan thawh tan niin Package B hi July 10, 2021 khan thawh tan a ni bawk a; kum 2 a ral tawh hnuah pawh hnathawh tur za zela 17 (17%) vel bak zawh a la ni lo a. NH 302 sial zauh leh laih that hna hi a muang mai ni loin, laih tawh chin pawh khawl hmanga nawr mamna hnuhma emaw, lung phah tur engmah hmuh tur a awm loh avangin ruah a sur hlek chuan a diakin a nal em em a, ni tin lirthei veivak an tân bakah chêtsual phah tam tak awmin mi pahnih in nunna an chan phah tawh nia thudawn a ni bawk.

Tlabung Village Council leh Tlabung Welfare Committee : Aizawl chuan he hna thawk mektu SRK Construction and Infrastructure Pvt. Ltd. chu he hna thawk zui zel tlakah an ngai lo tih sawiin, Contractor rintlak leh hnathawk tha tur pek thuai an nih theih nana hma la nghal tura NHIDCL an phut thu an sawi bawk.