Thu belhchian dawl lo sawi ah ZPM Leader puh

Mizoram Pradesh Congress Committee (MPCC) chuan ZPM Leader Lalduhoma thu sawi in belhchian a dawl loh zia a finfiahna nen an nei tih an sawi.

Nimin-a Aizawl Press Club-a thuthar thehdarhtute an kawmna ah MPCC Media Department-a Chairman Dr. Lallianchhunga chuan October 29, 2018 khan Zaingen YMA Hall, Khawzawl a thu a sawinaah ZPM Leader Lalduhoma'n vai thirchhe siamna Lengte-a ISPAT Industry khu cheng vbc.100 tam tak sawrkarin loan a pe a, chutah chuan Congress Sawrkar quarantor-ah a tang tih a sawi nia tarlangin, “Guarantor a tang tih awmzia chu ISPAT Company khuan a loan lak a rulh theih loh chuan Congress Sawrkarin a rulhsak ang tihna a ni, a ti,” tih an sawi a ni.

Dr. Lallianchhunga chuan Lalduhoma thusawi chu kum 4 liam taa a sawi pawh nise dawt a nihna a la bo loh avang leh he a thu sawina Video hi Youtube hmanga vawrhdarh a la nih lehzel avangin thudik zawk mipui hriata puanchhuah tula an hriat thu sawiin, MPCC Legal Cell Member Laldingngheta'n RTI dilna ni 4.7.2023-a Commerce & Industries Department in a chhanna atanga a lan danin Commerce & Industries Department, Govt. of Mizoram in ISPAT Industry hnenah loan pek a nei lo a, guarantor-ah pawh a tang lo tih a ni tih sawiin, ISPAT Industry-ten loan an dilna ah Industry Director chu guarantor-ah a tang lo tih leh Mizoram Sawrkar pawh guarantor-ah a tang lo tih ni 21.2.2012 khan sawrkarin a thuchhuahah a lo tarlang daih tawh niin a sawi bawk.