Sawrkar-ah BJP a tel ngei dawn - Vanlalhmuaka

BJP Mizoram Pradesh President Vanlalhmuaka chuan kumin Mizo-ram Assembly inthlanpui hnuah BJP chu sawrkarah a tel ve ngei dawn tih a sawi.

Akashvani Aizawl-in an kawmna ah BJP Mizoram State President Vanlalhmuaka chuan inthlan lo awm turah hian MLA 10 aia tlem lo an party-in an neih a beisei thu sawiin, eng pawh sawrkar sela sawrkarah an tel ve dawn niin a sawi a. Mizoram-a Political Party zingah Congress tih loh chu an thawhpui theih thu a sawi bawk. Tunhnaia BJP Mizoram Vice President banna leh Manipur boruak chuan inthlanna lo awm turah an party dinhmun a tihchhiat a rin loh thu a sawi a. An Vice President R. Vanramchhuanga chu Kohhran Upa a nih avangin Manipur-a Kristian Biak In hal chungchangah ban a tintuah reng tawh thu a sawi a. Sawrkar laipui hotute’n Manipur buaina an chinfel thuai a beisei thu leh an chingfel ngei ang tih rinna nghet tak an neih thu a sawi a ni. An MLA neih chhun Dr. B.D. Chakma chungchang sawiin Mizoram BJP President chuan politics a chawlhsan chuan amah thlaktu tur, Tuichawng bial-a ding tur Candidate tha tak an ruat leh mai dawn tih a sawi a. Inthlan dawnah khu lama an hotu liante’n theihtawp an rawn chhuahpui dawn thu a sawi bawk.