Thlam-ah ruang chhar; a mawhphurtu nia hriat man

Youtube lama ramhuai zawnna lam thil dah thin (Ghost hunter) channel pakhat chuan Zirtawpni zan khan Video an siamna ah ruang pakhat chharin Police ten enfiah hnuah ruang hi finfiah niin tualthattu nia hriat te pawh man an ni tawh.

Thudawn danin Youtube Channel pakhat hian Zirtawpni kalta (June 30, 2023) zan khan Dihmunzawl-a Aizawl chawmtu tui pump-na Tlawng lui bul-a Thlam pakhat ah ruang hi an hmu a, zan dar 12:00 velah Police te hriattirin Police te hian an hmun ah tihfel ngai te tifelin Forensic lama mithiam te pawhin ruang hmuhna hmun hi an enfiah nghal bawk a ni.

Police ten an chhuichian hnuah ruang hi Vanlallawma (55), Lunglei Rahsi Veng a mi ruang tih finfiah niin PHE Department-a Driver hna thawk thin a ni a, FSL mithiam ten an endikna atangin Vanlallawma hi thah ngei nia hriat niin a tukkhum-ah kutthlakna hnuhma hmuh tur a awm bawk a, a ruang hi Lunglei-ah lak niin Inrinni khan vuiliam nghal a ni.

He thil thleng hi Police te chuan chhui zui nghalin a mawhphurtu nia hriat mi pahnih te chu Inrinni khan Seling-ah man an ni a, heng mite hi Lalroliana (43) leh Lalsiampuii (40) nia insawi te niin Police ten thu an zawhfiahna atanga a lan danin anni pahnih hi nupa an ni a, nunna chan ta Vanlallawma te nen hian inkawm ho thin niin Vanlallawma leh Lalsiampuii te awmdan chu Lalroliana hian duh lovin thikthu avangin tum lawk pawh awm lovin a that niin an sawi a, nimin khan Court-ah hruai an ni.