Mizoram tan UCC a hlauhawm loh - AAP

Aam Aadmi Party (AAP) Mizoram chuan Sawrkar laipuiin Uniform Civil Code (UCC) kalpui a tum chu Mizoram mipuite tan a hlauhawm loh nia sawiin, he Dan siamna ah a nghawng turte räwn vek an duh tih an sawi.

AAP Mizoram hian Inrinni khan Aizawl Press Club-ah thuthar thehdarhtute kawmin UCC chu an thlawp thu an sawi a, amaherawhchu a dan siamna ah a nghawng turte rawn vek an duh tih an sawi a, India ram Sakhua leh Hnam hrang hrang awmkhawmna ah hman mai a har hle dawn tih sawiin, Mizoram mipuite tan a hlauhawm loh tih an sawi bawk.

AAP Asst Secretary Vanlalmawia Vanchhawng chuan UCC chuan Inneihna, Inthenna leh chhungkaw inrelbawlna hrang hranga India ram pumpui dan khat hnuaia luan khawmna a kawk nia sawiin, UCC chu kalpui anih chuan hnam leh Sakhaw tih dante awm tawh lovin dan khat hnuaiah Inneihna te, Inthenna te hi kalpui a ni tawh dawn tihna a ni tih a sawi a, BJP in kum 2014 khan India danpui Part IV-a Article 44 tlawhchhanin UCC chu kalpui tur ti mahse, Concurrent List hnuaiah inneih, inthen leh chhungkaw inrelbawlna lam a awm tlat avangin tih hlawhtlin theih a ni lo niin an sawi a, a. UCC an thlawp chhan pawh ‘An hmanna tur State ten an remtih chuan’ tih chauh a nih avangin Sakhua leh Hnam hrang hrang awmkhawmna ah hian hman a har hle dawn nia an hriat thu an sawi bawk.