Thalaite thiamthil haichhuah a nih theih nan Serchhp District Skill Competition 2023 neih a ni

Serchhip District chhunga thalaite an thiamna haichhuahna tura inelna, Serchhip District Skill Competition, 2023 chu nimin khan Serchhip DC Conference Hall-ah neih a ni a, he inelna ah hian Serchhip District chhunga zirna In pasarih atangin inelna chi li-ah zirlai naupang 38 telin a tithate hnenah lawmman hlan an ni.

Serchhip Deputy Commissioner Office buatsaihin Serchhip District Skill Competition, 2023-ah hian chawhma lamah intihsiakna a tel ten inelna hrang hrang neiin Zai (Singing), Painting/Drawing, Handicraft leh New Startup Idea Pitching-ah te inelna neiin June thla tir atang khan intihsiakna a tel tumte tan hian Online hmanga inziahluhna hun hawn a lo ni tawh a, nimin-a intihsiakna neih ah hian Zai intihsiak ah Zirlai 12, Kutthemthiam hmanga thil insiam siak (Handicraft)-ah Zirlai 6, Lem inziahsiak (Painting/Drawing)-ah zirlai 18 bakah eizawnna kawnga ngaihtuahna thar phochhuah kawnga inelna ah zirlai 2 an tel a ni.


Intihsiakna neih hnu nimin chawhnu dar 3:00 khan intihsiakna a lawmman semna nei zuiin he hun hmanpuitu Serchhip District Bawrhsap Nazuk Kumar IAS chuan hlawhtling turin inpekna tak tak nena beih a tul thin tih sawiin, “Kan tih apiang kan hlawhtling nghal lo anih pawhin beidawng lova kan beih a tul thin. Hlawhchhamna pawh hi kan hringnun zirlai tha tak a ni tel tih i hre reng ang u,” tiin inelna a tel zirlai naupangte chungah lawmthu sawiin, duhsakna a hlan nghal bawk.

He hunah hian Mahatma Gandhi National Fellow, Ministry of Skill Development and Entrepreneurship, Govt. of India atangin Vikas Walke chuan he inelna hian naupangte thiamna haichhuah sak leh hmasawn zel tura buatsaih chu a tum a nih thu a sawi bawk.

Nimin-a intihsiakna ah hian Zai-ah Re-mlalvuani (EMRS) chu pakhatna niin J.C. Lal-hruaitluanga (Sainiki School) leh Elizabeth Lal-hruaitluangi (Marian H/S) te chu pahnihna an ni a. Handicraft-ah Lalrammuanpuii (Goodwill EA) chu pakhatna niin Valentino VL Malsawm-zuala (GEA) chu pahnihna a ni bawk a. Painting-ah C. Vanlalmuanpuia (Sainik School) chu pakhatna niin Sarah Lalbiakdiki leh Lalruatkimi Colney (GEA) chu pahnihna an ni bawk.

Comments

Popular News (Last 30 Days)

LPG man bithliah thar