Serchhip District-a Kel vulh mek te PPR Vaccine pek hna kalpui mek a ni

Tunhnaiah Serchhip District-a Thinglian khua ah Kel engemaw zat Peste Des Petits Ruminants (PPR) vanga a thih hnuah Serchhip District chhunga Kel vulh mek te chu hri danna pek hna kalpui mek a ni.
Serchhip-a AH&Vety Department hotute chuan tunhnaia Thinglian khuaa Kel thi te chungchang hi a hmuna an kalchilh tawh thu leh a theih anga hma an lak tawh thu sawiin, State pawn atanga Kel lakluh erawh Department hriatpuina a kalpui a nih loh thu an sawi a. Heng Kel te Supply tur thlanna pawh an hriatpui loh thu sawiin, hri avanga harsatna a thlen hnuah an hnena hriattir a nih angin an theihtawp chhuaha hmalak a nih thu an sawi bawk.


AH & Vety Department hotute chuan Serchhip District-ah hian Thinglian bakah Lungpho leh Vanchengte-ah te pawh Kel hi sem a nih thu sawiin, heng khua te pawh hi an tlawh tawh thu leh Thinglian an tlawh tumin Lungpho khuaa Kel dam lo te chu damdawi pek an nih tawh thu a sawi a, niminpiah khan Vanchengte khua pawh hi tlawh lehin PPR Vaccine hi pek a nih th leh Vanchengte khua ah hian Kel sem ni ve bawk mah se anni hian Mizoram chhung atanga Kel hi an lei avangin tun dinhmunah harsatna an tawh loh thu leh fimkhur thu ah an Sample erawh enfiah tura an lak thu an sawi a. Heng khaw pahnih bakah hian Serchhip District-a Kel vulhna khaw dang-ah te pawh PPR Vaccine hi pek a nih dawn thu an sawi bawk a ni.

Lungpho VC Secretary C. Rodingliana chuan an bialtu MLA leh Minister Er. Lalrinawma hmalakna in an khua ah hian Kel vulh duhte tan hmalak a nih thu leh chhungkaw 50 ten a bul tanna atan bialtu MLA kaltlang hian Kel hi pakhat theuh dawngin Kel vulhna te hunga hma an lak thu a sawi a. Thinglian khuaa Kel Supply-tu hian an khua ah pawh a supply thu leh Kel 50 zingah hian 37 lai a thih tawh thu leh 13 te erawh chu ala dam thu a sawi a, heng Kel la dam te hi AH&Vety Department ten Vaccine an pek tawh thu a sawi a. An khua ah hian Kel sem a nih hma hian lo vulh an awm loh avangin Kel thi te hi sem zinga mi vek a nih thu a sawi bawk.

Vanchengte VCP VL. Chama chuan an khua ah MLA hmalakna kaltlanga Kel vulh mi 18 an awm thu sawiin, mi pakhat hian Rs. 8000/- chu Kel leina tur an dawn thu a sawi a, MLA hmalakna hian a In sakna tur leh an vulhna hungna tur hmuin, a hnuah a pa 5 an dawn bakah no nei te an awm avangin an khua ah hian Kel 32 a awm mek thu a sawi a. Heng an Kel te hi Mizoram chhung atanga an lak thu leh tun dinhmunah harsatna lutuk an la tawk lo tih an sawi a. AH & Vety Department lam pawhin an khua ah tlawhin vacccine an pek tawh thu a sawi bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man