Serchhip Zawlpui zau-a leilet neitute harsatna Agriculture Minister in a hmunah a enpui

Agriculture Minister C. Lalrinsanga chuan nimin khan Serchhip Zawlpui Phai tlawhin NH. 54 laihna leivung avanga kuthnathawktute harsatna tawh a enpui a, he harsatna chungchang ah hian NHIDCL hotute ko in a lo sawipui tur thu leh a theih anga hmalak a nih tur thu a sawi.

Zawlpui Phai tlawhtu Agriculture Minister hnenah hian Lumtui Zau leh Zawlpui Zau FMC hruaitute chuan harsatna an tawh te lo thlenin, kawngpui hi a taka laih a nih hma kum 2019 khan an tuilak tibuai thei zawnga leivung paih lo tura an lo ngen lawk tawh thu leh Serchhip leh Keitum inkarah leivung paihna hmun (Spoil Bank) pathum pek an nih thu an sawi a, “Keini in an Spoil Bank te dawl nghehna siam turin kan ngen leh a, an dawl ta si lova, hetiang hi a lo thleng ta a ni,” an ti a.  Tuna an harsatna hi June ni 29-a lo thleng thar leh a nih thu sawiin, “Kawngpui laihna leivung dawl ngheh tak loh hian lui pahnih Zawlpui lui leh Tuilut lui a khuap a, tui hi rei tak dawl ding leh zo si lovin June ni 29 khan a rawn chim ta a, Sabereka Khuangkaih ang maia rawn chim thut kha a tamin a chim chin a sang em em mai a. Kan tuilakna te, kan hmunhma te a rawn tichhe ta a ni,” an ti. Harsatna an tawh te hi Serchhip District Deputy Commissioner kaihhruaiin kawng laitu Company te nen Joint Inspection an neih tawh thu leh an Zau-a leivungin chhiatna a thlen dan tlangpui an sawifiah a. Chhungkaw pahnihin kuminah an leilet an siam thei dawn lova, chhungkaw pali tuilakna pipe a chhia a, chhungkaw pakhat Rubber tiak 3500 a chhe bawk tih an sawi a. Khawl lian hmanga leivung then tur engemawzat a awm avangin Vawiin thlengin JCB hmanga ni 9 chhung hna an thawh tawh thu leh leivung paihna senso zualpui hi chu Company lam hian pek an inhuam niin an sawi bawk.


Agriculture Minister C. Lalrinsanga chuan ram in hmasawnna kawng a zawh zel a, kawngpui pawh kan mamawh ngawih ngawih a nih avangin kan thawh a ngai a, heng hmasawnna hnathawh lian te hian nghawng engemaw a lo neih leh thin thu leh tunah pawh a nghawng harsatna kan han tawk chu pawi a tih thu a sawi a, a dawnsawn dan tawk kan lo thiam te pawh a tul nia a hriat thu a sawi a. Hmasawnna hnathawh vanga an harsatna tawh a hriatthiampui thu pawh sawiin, an tawrhna hi sawrkarin a hriatpui thu leh  sawrkar atanga ngaihtuah sak theih awm apiangte an ngaihtuah sak tur thu a hrilh a, leilet siam theih lohva awm chhungkaw hnih Thanhnuna (Chhim Veng) leilet siamna tur hi FOCUS atanga cheng nuai khat an pek tur thu leh Chawngsavunga (Dinthar Veng) leilet pawh an ngaihtuah zui tur thu a sawi bawk.


Agriculture Minister chuan Leiet-a tui kawng harsatna kumtina kan tuar thin chu Solar Water Pump hmanga kawng awlsam zawk sawrkar in a dap mek thu sawiin, Solar Pump supply hna hi a chhuak tep tawh tih a sawi a, Mizoram hian Unit 2500 chuang nei thei turah an in ngaih thu leh  man chawi lova awlsam taka tui neih dan hi a awm thuai dawn niin a sawi a. Kan ruahtui dawn te rang taka a luan ral mai loh nana hma lak a tulzia pawh a tarlang a ni.


Kuthnathawktute nen inkawmna an neih zawh hnu hian Minister hian leivung paih avanga Zawlpui lui leh Tuilut lui ring-a leilet siam thin ten harsatna an tawh chu a hmunah a tlawh zui nghal a, Leivung paihna chungchanga an Department kaihhnawiha harsatna awm chungchangah NHIDCL hotute ko in a lo sawipui tur thu a sawi a. Hei bakah hian Agriculture Department hotute leh harsatna tawk mek Leilet neitute hian harsatna an tawh te hi chiang zawk leh mumal zawkin lo enfiah se a ti bawk.


Agriculture Minister hi Serchhip DAO Lalchharliana leh a thawhpui ten an lo dawng-sawng a, Minister tawiawmtu MNF Publicity Board Vice Chairman J. Malsawmzuala chuan helai hmuna harsatna thleng leh a sutkian dan tur a hmun ngeiah Minister in a enpui chu lawmawm a tih thu a sawi bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar