Kan ram leh hnam hmasawnna tur leh a chhe laite siamtha turin MHIP President in an Member te a chah

MHIP General Hqrs. President Ngurmawii Sailo chuan kan ram leh hnam hmasawnna tur leh a chhe laite siamtha tura nasa lehzuala tan la theuh turin MHIP member te chu sawmin, “Samari Mi tha thinlung pu in kan awmhmun theuh ah tanpui ngaite tan i che chhuak zel ang u,” a chah bawk.

Nimin-a MHIP Day vawi 49-na puala thuchah a sawi ah MHIP General Hqrs. President chuan MHIP Day vawi 49-na pual hian MHIP Member te chibai bukin, tunlai khawvel hmasawnna thangduang tak karah Pathian tihna tak tak nei tura an fate an kaihhruai a ngai hle tih a sawi a, “Thalaite zingah pawnlawi taka Sakhuana kalpui leh Social Media a thalo zawnga hmanna a nasa hle a, a pawi a ni,” tiin “Keimahni ngeiin kan fate kan inchhungkhurah kan zirtir a, rilru thar nen chhungkua a Pathian tih mi ni turin tan i la thar theuh ang u,” a ti a. Ram leh hnam vei tura kan fate kan zirtir a tul thu pawh sawiin, “Thalaite zingah ram leh hnam hmangaihna chang hre lo tam tak an awm ta. Keini an nute hian Israel fate angin kan fate hi ram leh hnam hmangaih nachang hre tur leh chutiang rilru pu chunga engkim ti turin kan zirtir a ngai. Silai leh hmanraw dang nen ramri kan pan ve thei lo, mahse, an thinlungah ram hmangaihna chi kan tuh nghet thei a ni,” tiin hnamdang nupui/pasal nei lo tura zirtir a tul thu a sawi bawk.

Hmeichhiaten kil hrang hrangah hma an sawn viau lai hian mipate an hnungtawlh loh nan nu ten mawhphurhna an neih thu pawh MHIP President chuan sawiin, “Sual laka vennan kan fapa te inchhungah awm awltir mai mai lova kan chhawr hriam a, ram leh hnam tan an hlutzia kan hrilh fo a tul hle,” a ti a. Mizo Hmeichhiate chu kan ram siamtha tur leh kaihruai tur hian an tha tawk tih sawiin, “Zoram tan thil tha tam tak kan ti thin a, kan ti zel ang. Kan hma lawka MLA General Election lo awm turah pawh hian insit miah lovin rawn pen chhuak teh u khai, kan ram tan hian Mizo hmeichhiate hian lungrual takin tan i han la tlang zel teh ang u,” a ti bawk.

MHIP General Hqrs. President chuan an Motto ‘Mite tanpui’ tih a nih angin hmeithai leh fahrah te, chanhaite chhawmdawl kawngah tan la zel tura chah bawkin, MHIP Branch hrang hrang ten kan thenawm Myanmar, Bangladesh leh Manipur State atanga raltlan lo kalte pawh an theih ang tawk theuhin an tanpui tih sawiin, MHIP Gen. Hqrs. hmingin lawmthu a sawi bawk.