Serchhip District-a Jal Jeevan Missions leh Swatch Bharat Missions (G) hnuaia hmalakna thlirlet a ni
.jpeg)
Serchhip District-a Swatch Bharat Missions (Grameen) leh Jal Jeevan Missions hmalakna te thlirletna (Review Meeting) nimin-a Serchhip District Bawrhsap hova neih ah PHE Serchhip WATSAN Division-a EE, Er. Isaac Lalchhuanawma chuan JJM leh SBM hnuaia an hmalakna te hi a tarlang a. He huna tarlan a nih danin Jal Jeevan Missions (JJM) hnuaiah hian khaw hrang hrang tan Tui lak hna leh In tin te Tui Connection pek hna thawh niin kum 2019- 2020 Action Plan-a khaw 18- Sialsir, Hmunzawl, E. Thinglian, Khawlailung, Lungkawlh, Hriangtlang, Buangpui, Vanchengte, Chhingchhip, Chanin, Buhkangkawn, Hmuntha, Khawbel, Thentlang, Hmawngkawn, Baktawng, Phulmawi leh Phaibawk-ah te thawh zawh an ni a. Annual Action Plan 2020-21 hnuaiah khaw 7- Chekawn, Ngentiang, Rullam, Tuichang, E. Bungtlang, Neihloh leh Hualtu te thawh zawh a ni bawk a. Heng khuate bakah hian khaw 21 dang te pawh tunah hian thawh mek a ni a, a tam zawkte hi thawh zawh tep tawh niin, an zinga khaw pakua hi Solar Pump hmanga thawh an ni. District chhunga JJM hmalakna khua 35-ah khaw 13- Chekawn, Sialsir, Buhkangkawn, Chanin, Hualtu, Thentlang, Chhingchhip, Ngentiang, Rullam, Tuichang, E. Bungtlang, Neihloh leh Buangpui te chu tuilakna leh tui connection nei vek tawh khua, ‘Har Ghar Jal Villages’ an ni tawh a ni.
Swachh Bharat Missions (Grameen/Rural) hmalakna hnuaiah District chhunga chhungkaw tinten Individual Latrine an nei vek tawh a, thingtlang khua zawng zawngah Community Sanitary Complex leh Waste Collection Centre te din vek tawh niin Community Soak Pit chu E. Lungdar Block-ah 47 sak zawh tawh niin Community Compost Pit 68 sak zawh tawh an ni a. Serchhip Block-a khaw 24-ah Soak Pit 91 sak mek niin Community Compost Pit 125 sak mek a ni a, hnate hi zaa sawmkua (90%) zawh tawh an ni. E. Lungdar Block-a khaw 11 chu ODF Plus-ah puan tawh niin ODF Plus Block-ah puan zui a ni a,Serchhip RD Block-a khaw 7 chu ODF Plus khua ah puangin khaw 17 te chu ODF Plus khua a puan tuma hmalak mek a ni bawk.
Plastic Waste Management Centre chu Thenzawl-ah sak zawh tawh niin, Bailing Machine leh Twin Shaft Shredder te pawh bunfel niin, Electric Connection buaipui mek a ni a. Serchhip District chu Swatch Mahotsav 2019-ah Mizoram-a District fai pathum zingah thlan a ni a, Swatch Survekshan Grameen, 2019-ah North East States leh UT te inelnaah pahnihna lawmman pek niin World Toilet Awards, 2020-ah India ram puma chawimawina dawng District 20 zingah Serchhip District hi a tel ve nghe nghe a ni.
Comments
Post a Comment