Serchhip District-a Thinglian khua ah PPR vangin Kel 157 zet a thi tawh

Serchhip District chhunga Thinglian khuaa Kel vulh zingah 157 zet chu Peste Des Petits Ruminants (PPR) vangin a thi tawh a, Thinglian khawtlang hruaitute chuan an khuaa Kel vulh tur tunhnaia State pawn atanga lakluh sem a nih hnuah hri hi tai darh nia an hriat thu an sawi.
Thinglian khua hi tunhma lam atanga Kel vulh thinna khua niin a khaw mipui ten nasa zawka Kel vulh lama hma an sawn theihna tur leh Kel vulhna hmunpui-a siam turin bialtu MLA leh AH&Vety Minister Er. Lalrinawma chuan Project siama hma lak puiin MLA Fund hmangin Kel 92 leina tur a pe a, heng bakah hian Kel tlan tur Tuikhur siamna leh Kel vulhna tur hmun hungna turte pein hmalak a ni a. MLA in sum a pek hmang hian State thenawm Assam (Silchar) ami Kel 92 chawkluh niin, May ni 28 khan Thinglian thlenpui a ni a, heta tang hian Kel hri leng avang hian Kel 86 thi tawhin, khawtual mi in Kel an vulh sa 76 atangin 71 a thi tawh bawk a, tun thlengin Thinglian khuaa Kel 168 atangin 11 chauh an dam tawh a ni.


Thinglian khuaa Kel te hi an thih hmain an chau a, an hnap te tlain an mit a berh bawk a, rei vaklo ah an thi mai thin nia thudawn niin Bialtu MLA hmalakna in Thinglian khuaa Kel te hi Serchhip District Veterinary Office-a ran Doctor ten enkawl a, awmzia erawh a nei lutuk lo nia thudawn a ni a, an thisen Sample te Bhopal a thawn a enfiah a nih hnuah heng Kel thi te hi Peste Des Petits Ruminants (PPR) vanga thi a ni tih finfiah a ni tawh a ni.

Thinglian khaw mi te chuan hetiang Kel natna hri a len tanna nia an hriat chu an khuaa chhungkaw awm zawng zawngte hnena Kel sem atang nia an hriat thu sawiin, Kel an dawn thar atanga kar hnih hnu velah an Kel vulhte chu a thi tan tih an sawi a. MLA Fund atanga Kel an sem hi Serchhip khaw mi Supply a nih thu pawh sawiin, an khuaa chhungkaw awm zawng zawng 84 te chu sem an nih thu leh Kel an dawn te hi Silchar chhehvel khuaa lei nia an hriat thu an sawi a. Thinglian VCP Edenthara chuan Kel te hi Assam atanga an lakluh dawnah an hriselna dinhmun enfiah a nih loh avangin vanduaithlak takin PPR hi a lo tai darh ta nia rin a ni, a ti bawk. Thinglian-a Kel vulhtute hian an Kel vulh te hi Insurance an tih loh avangin vanduaina an tawh ah hian zangnadawmna hmuh let tur an nei lo nia thudawn a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar