Serchhip District Police ten kum chanve chhunga thubuai 68 an ziahluh ah rukruk kaihhnawih a tam

Kumin January atanga June thla tawp thleng khan Serchhip District Police te chuan thubuai 68 ziaklut tawhin heng zinga thubuai 54-ah te chuan Chargeshgeet thehluh a ni tawh a. Kumin chhunga thubuai ziahluh zingah hian rukruk leh a kaihhnawih thubuai a tam fal hle a ni.

Serchhip SP Office atanga thu kan dawn danin kumin kum chanve, January atanga June thla tawp thleng khan Serchhip District chhunga Police Station pathum-ah thubuai 68 ziahluh ni tawhin heng zinga 65 te chu IPC hnuaia ziahluh niin a dang pathum te chu Non-IPC hnuaia ziahluh a ni a, thubuai ziahluah zinga 54 te chu chhui ngai ang ang te chhui zo in Court-a thubuai ngaihtuah turin Chargesheet thehluh a ni tawh a, thubuai pakhat erawh chhui zui tawh lo turin Final Report siam a ni thung a, thubuai chhui lai 13 la awmin Court-a thubuai ngaihtuah lai 44 a awm bawk a, thubuai 10-ah Court in thutlukna siamin thubuai nei te convict an ni tawh bawk a, heng te hi rukruk kaihhnawih thubuai vek a ni.

Kumin chhunga Serchhip District-a IPC hnuaia thubuai ziahluh 65 zingah hian rukruk leh a kaihhnawih thubuai 48 zet ziahluh niin heng te hi mi rawk leh mi thilruk thubuai te a ni a, heng te hi thubuai ziahluh zawng zawng atanga chhutin za zela 70.58 zet a tling a, hun engemaw chen chu thubuai ziahluh zingah hian rukruk kaihhnawih thubuai hi a tam ber ni chho rengin hei hi ruihhlo hluar nen inkaihhnawiha ngaih a ni bawk a. Rukruk baka thubuai ziahluh tam ber chu Criminal Intimidation hnuaiah niin thubuai 3 ziahluh a ni bawk.

Kumin chhunga Serchhip District Police ten pawikhawihna liantham-ah inthahna thubuai ziahluh pahnih awmin Jail tang tlanchhuak thu-buai pakhat a awm bawk a, kumin hian pawngsual leh naupang kumtling lo khuaikhem thubuai ziahluh a la awm lo thung a. Thubuai ziahluh dang te hi mi tihhmingchhiatna te, mi bumna, lirthei a chetsualna leh pawikhaawihna dang te a ni.

Kumin chhunga Non-IPC hnuaia thubuai ziahluh pathum te hi ND&PS Act hnuaia Heroin No. 4 man kaihhnawih te, Thenzawl dai-a ralthuam man avanga Arms Act hnuaia thubuai ziahluh leh MLP Act hnuaia thubuai ziahluh pakhat theuh te an ni a, ralthuam man thubuai hi la chhui mek niin a dang pahnih te hi Court-a ngaihtuah turin chargesheet thehluh a ni tawh thung.