Manipur buaina avanga Zohnahthlakte tawrhna tawrhpuina hun Aizawl-ah hman a ni

ZO Reunification Organisation (ZORO) chuan Manipur tualchhung buai avanga Zohnahthlak kan unaute harsatna tawk mek thlavang hauhna, tawrhpuina leh nunna chan te sunna hun nimin khan Aizawl-ah hman niin he huna tel te chuan India Sawrkar chu Manipur State a awm Zofate rorelna hran pe tura an duh thu Resolution siamin an pass bawk.

Aizawl Zodin-a he hun hman hi ZORO Thalai Hqrs. Vice President Michael Lalramsanga chuan kaihruaiin ZORO President R. Sangkawia chuan Meitei ten kawng hrang hrangin Zofate an phiar ru niin a sawi a, “Meitei te hi an Sawrkar nen tangkawpin kan unau Zofate hi an bei a ni. Manipur tualchhung buaina hian thla hnih a pel tawh a, heti chunga India Prime Minister a ngawi reng hi kan hrethiam lo hle a ni,” tiin “India Sawrkar hian Zofate hi India-ah min ngai lo nge tih hi ZORO zawhna a ni,” a ti bawk.

ZORO General Secretary L. Ramdinliana Renthlei chuan Manipur buaina ah Meitei ten Kristian Biak In an bei nasa hle tih sawiin, “Mizoram a Meitei ten zalen takin dawr an hawng a, zalen takin Aizawl khawlaiah an la leng a, kan unauten harsatna an tawk zel a nih chuan Mizo thalai te thin a rim tawh a, kan awm mai mai dawn lo. Mizoram chhunga Meitei te pawh lo fimkhur turin ka chah duh che u a ni,” a ti bawk.

Nimin-a he hun hmanna ah hian he buaina avanga Zohnahthlak nunna chan te sunna hun hman niin Manipur Chief Minister Biren Singh, Prime Minister Narendra Modi leh Zo tlangval David Thiek lu tantu Mairembam Romesh Mangnag te lim hal a ni a. He huna tel te hian Resolution pathum pass in, he buaina avanga Zohnahthlak te tawrhna chu an tawrhpui thu leh Manipur-in a awp mek Zofate a hnam anga nuai bo an tum mekna atanga damkhawchhuak tura an beihnaah leh Manipur State rorelna laka la hrang tura India Sawrkar an ngen mek chu an thlawp thu an tarlang a. ‘India Sawrkar hian Manipur State a awm Zofate hi rorelna hran pe rawh se’ an tih bakah ‘Khawvel hmun hrang hranga awm Zofate kan insuih-kawm a, lungrual taka kan awm a, rorelna pakhat hnuaia kan awm theih nan hma kan la zel dawn a ni,’ an ti bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar