Serchhip-ah Congress Party huaihawtin 'Public Meeting cum Street Campaign' neih a ni

Serchhip Block Congress Committee (SBCC) leh Mizoram Pradesh Congress Committee (MPCC) buatsaihin nimin khan Serchhip Bazar-ah 'Public Meeting cum Street Campaign' neih a ni a, MPCC hruaitute leh tunhnaia an Party zawm thar mi langsar tak tak ten thu an sawi a ni.
Serchhip Block Congress Committee (SBCC) President Lalramnghaka Kawlni kaihhruai he hunah hian MPCC Treasurer Dr. Lalmalsawma Nghak chuan India ram chu thuang hnih (2) lianpui ah kan inthen tih sawiin, a lehlam ah BJP leh a thlawptute awmin lehlam ah Congress Party leh a thawhpuite an awm thu a sawi a. Tunhnaia kan rama UCC kalpui tumna leh Manipur-a thil thleng mek te sawiin, kumin kumtawp lama Mizoram inthlanpui lo awm turah tute lamah nge kan awm a, tute tha ti chak turin nge Vote kan thlak tih kan ngaihtuah a tul thu a sawi a. Congress Party Policy chu 'Tang puihna' a nih thu sawiin, hlawhtling tur leh dingchhuak tura tan lak leh an taihmak a tul thu a sawi a, mitin ten kan theihna zawnah tang deuha hma kan lak thu leh chung mite tana beisei a pek chu Congress Party tum a nih thu a sawi bawk.

He hunah hian tunhnaia Congress Party zawmtu Chief Secretary hlui Lalnunmawia Chuaungo pawhin Congress Party chu Serchhip khawpui Block Hqrs. dinhmun atanga District dinhmuna hlangkaitu, hmasawnna hna hrang hrang thawktu a nih thu a sawi a. Serchhip chu khaw taima, hna thawk nasa leh thlai chi hrang hrang thar nasa khua a nih thu sawiin, chutihrual chuan hmalakna tur erawh tam tak ala awm thu a sawi a, heng hmalakna tur hian ruahmanna tha an neih thu a sawi bawk. Lalnunmawia Chuaungo chuan mihringte hi hruaitu nei tur kan nih thu leh hruaitu tha kan nei a nih chuan hma pawh kan sawn thin thu a sawi a, sawrkar inrelbawlna ah pawh Minister leh MLA tha tak tak nei mah ila Chief Minister ber a that loh chuan ram rorelna tha kan nei ngai dawn lo tih sawiin, MPCC President Lalsawta chu mi rintlak leh eirukna a fihlim, thil tha lo tih duh lo bur a nih thu a sawi a, “Ani kaihhruaina hnuaiah Mizoram hian sawrkarna a siam a nih chuan sawrkar tha kan din ngei ang,” a ti bawk.

Tunhnaia Congress-a lawmluh Vanneihthanga Vanchhawng pawhin Congress-ah kan ram tana thil tha a hmuh avanga lut a nih thu sawiin, ‘Thil tha, kan banphak mai-a awm hi kan tanrual chuan State dang te pawh umphak ve thei mai kan ni tih kan hria,” a ti a, kan ram ah siamthat (reform) ngai tam tak a awm thu sawiin, chutiang ti thei tur chuan Congress Party zawm a nih thu a sawi bawk. He hunah hian MPCC Campaign Committee Vice Chairman T. Sangkunga bakah Serchhip bial-a INC Candidate tur R. Vanlaltluanga leh Miriam L. Hrangchal te pawhin thu an sawi bawk a ni.