Serchhip-ah EVM Demonstration Centre hawn a ni

Mipui ten Vote thlakna khawl, Electronic Voting Machine (EVM) hman dan an hriat theihna tura EVM an hman chhin theihna tur, EVM Demonstration Centre chu nimin khan Serchhip-ah hawn niin EVM hman dan zirtira hmun hrang hranga kal tur Mobile Demonstration Van (MDV) pawh hawn nghal a ni bawk.
EVM Demonstration Centre hi Serchhip DC Office Complex-ah buatsaih niin he Centre hawngtu District Bawrhsap leh District Election Officer Nazuk Kumar IAS chuan kan hmaa inthlanpui lo thleng tur chu fel fai taka kalpui a nih theih nan inbuatsaihna neih chhoh mek a nih thu a sawi a. Election Commission of India in inbuatsaihna kalpui dan tur a duan mil zela engkim tha taka a kal theih nan District Election Office chu a inbuatsaih zel a, nimin a hawn tak Demonstration Centre-ah hian a duh apiang ten vote a thlak chhin theih a, zawhfiah duh nei tan pawh zawhfiah theih a ni, a ti bawk. He hunah hian Bawrhsap hian EVM hi hmangin Vote hi a thlak chhin nghal bawk a ni.

EVM Demonstration Centre-ah hian Vote thlakna khawl leh VVPAT te dah niin mipui a duh apiang tan Vote thlak chhin theih niin hei hi inthlan puan hmaa neih fel vek tura ruahman a ni a. Hetiang Centre hi SDO (Civil) thuthmun North Vanlaiphai leh Thenzawl-ah te pawh siam tur niin Mobile Demonstration Van hi inthlan hmain District chhunga Polling Station zawng zawng fan chhuahpui hman tum a nih thu Election Officer Lalrinsanga Hnamte chuan a sawi bawk.

Hemi hma nimin chawhma lam khan Ser-chhip DC Office-a EVM Strong Room chu Political Party hrang hrangte hriatpuina hnuaiah  hawn niin EVM/VVPAT Warehouse Quarterly Inspection neih a nih bakah EVM Demonstration a hman turin EVM pariat chu lakchhuah a ni a, nimin-a heng hun hmanna ah hian District thuneitute leh Political Party te bakah thuthar theh-darhtute an tel bawk a ni.