October thla ah Pro Fight nei dawn

LPS Pro Fight vawi 10-na leh Professional a nih hnua a tum hnihna chu kumin October thla khian khelh leh tum niin a hmun erawh tihchian ala ni lo thung.

Kumin a LPS Pro Fight khelh turah hian Weight hrang panga-ah Title inchuh leh tur a ni dawn a, kum 17 chin chunglam a duh apiang Mizoram leh State dang atang pawhin anmahni insengso in an tel thei dawn a. Kum kalta ah khan Mizoram mai ni lo Zohnahthlak tute pawh tel phalsak a ni tawh a. Hetih rual hian Pro Fight boruak an lo hriat atangin India ram hmun dang hmarchhak State mai ni lovin Haryana, Delhi leh State lian zawka Boxer-ten tel ve an chak thu an sawi avangin tun tumah hian an tan kawng hawn sak a ni a, senso an intum vek a ngai thung dawn a ni.

Kumin hian Mizo Boxer-te tam zawk an tel theih nan Weight then dan thenkhat erawh tihdanglam a ni a; Flyweight-in kg 48-52 huamin Bantamweight-ah kg 52-56, Featherweight awm tawh lovin Lightweight-ah kg 56-61, Welterweight-ah kg 61-67 leh Middleweight-in kg 67-74 a huam dawn a ni.

LPS Pro Fight Organising Committee chuan kumin hian Falkland Veng a sak mek LPS Arena-ah he intihsiakna hi huaihawt a tum a, tun dinhmunah thawh zawh hman a ni dawn em tih a chian theih loh avangin a hmun tur chiang takin a sawi theih rih lo a. Organising Committee chuan a hmun tur tihchian mai theih ni rih lo mah se Boxer-ten inbuatsaihna hun an neih theih nan Pro Fight neih a nih hun tur hi puanzar a ni ta a ni.

Kum 2009 khan LPS Vision leh Mizo-ram Boxing Association chuan a vawi khat nan hlawhtling takin Pro Fight an huaihawt a, kum 2010 leh 2011-ah chhunzawmin 2014, 2015, 2016 leh 2017-ah kum li neih zawn leh a ni a. Kum 2019 a neih leh a nih hnuah 2020 leh 2021-ah hri leng vangin neih theih a ni ta lo thung a, kum 2022-ah Promotional Fight ni thin kha Professional Fight pangngai anga kalpui a ni ta zawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar