MZP in Manipur tlawhin a dinhmun an enpui; Manipur atangin raltlan 12,492 an rawn lut tawh

Mizo Zirlai Pawl (MZP) General Hqrs. hruaitute chu tunlaia Manipur buaina avânga mipui venghimtute dinhmun hriatpui tur leh Zofaten harsatna an tawh hrang hrangte enfiahin Manipur-ah an kal a, Mizoram mipuite thawhkhawm tanpuina chi hrang hrang an hlan bawk. MZP General Hqrs. hruaitute hi niminpiah khan Manipur-ah kalin Manipur tualchhung buaina avanga hnam tana beitute chu an duty na hmun hmun hrang hrang, Lamka leh a chhehvel (Frontline)-ah tlawhin an dinhmun te enfiah a ni a, Mizoram mipuiten tanpuina pawisa an thawh leh mi thahnemngai ten damdawi thahnem tak an thawhte chu hlan a. Manipur-a Zofate chuan buaina an tawh mekah Mizoram sawrkar, Kohhran, Political Party, NGO leh mipuiten an ngaihsakna ah an lawmzia an lo sawi bawk a ni.

MZP hruaitute hi nizan hmasa a Joint Student Body (JSB), Lamka buatsaih, Manipur buaina avânga nunna chante hriatrengna hun ‘Candle light vigil’ ah telin MZP President Lalnunmawia Pautu chuan, “Tun hi tanrual hun a ni a, inlak hran hun a ni lo. Kan insuihkhawm a, kan inlungrual hi kan hnam dinchhuahna atan a pawimawh hle a ni,” a ti. Zofate hian chhan tur ram leh hnam kan la nei chu a lawmawm hle tih sawiin, “Mizoram mipui, NGO, Kohhran leh Sawrkar chu Manipur Zofate lama an tan tlat thu a sawi a, “Keini in kan ei chhung chuan in nghei bik lovang,” a ti bawk. 

Hmar Students Association (HSA) General Headquarters pawh MZP hian tlawhin tunhnaia Meitei ten rawng taka an thah David Thiek ralna hun hman nghal a ni a, râlna hi HSA hruaitute hnenah hlan a ni.

Hetihlai hian Manipur buaina avanga sahimna zawnga Mizoram-a rawn raltlan chu nimin thleng khan mi 12,492 an tling tawh a, an zinga 2764 te chu Relief Camp-ah awmin midang 9728 te chu Relief Camp pawn lama awm an ni a, Kolasib District-ah raltlan 4425 lutin raltlan tamna ber District an ni a, Aizawl District-ah 4219 lutin Saitual District-ah 2940 an rawn lut tawh bawk a. Heng bakah hian Champhai District-ah 361, Mamit District-ah 158, Khawzawl District-ah 128, Serchhip District-ah 99, Lunglei District-ah 63, Lawngtlai District-ah 61, Saiha District-ah 30 leh Hnahthial District-ah mi 8 an rawn lut tawh a. Serchhip District-ah hian niminpiah khan mi 21 rawn lut awm belh lehin raltlan mi 99 an awm mek a, an zinga 57 te hi Thenzawl-ah awm niin Serchhip-ah 24 leh Khawlailung leh Khumtung-ah mi 4 ve ve an awm bawk a ni.

Comments

Popular News (Last 30 Days)

LPG man bithliah thar