The Shop and Establishment Act hman ve thuai phut

National Trade Union of Mizoram (NTUM) hruaitute chuan mi hnuaia thawkte hamthatna tur, The Shop and Establishment Act chu Notification chhuah thuai an duh thu an sawi.

NTUM hruaitute hian nimin khan Aizawl Press Club-ah an President C. Remtluanga hova thuthar thehdarhtute kawmin Muster Roll/Casual te hlawh pun nana sawrkarin Minimum Wages Act, 1948 a ennawn chu Cabinet-ah pass in, notification pawh tihchhuah a nih thu sawiin, sawrkar hmalakna ah hian lawmthu an sawi a. Kum 2020 khan MR sang riat chuang zet chu sawrkarin NTUM ngenna avangin Provisional Employee (PE)-ah an hlang kai tawh tih pawh sawiin, “Tun din-hmunah hian MR hi 3,365 lai sawrkar record-ah an la awm mek a, anni hi tun hlawh ennawn hlawkna teltu hmasa te chu an ni,” an ti a. Tuna MR awm mek te hi Provisional Employee (PE) an nih ve theih nan sawrkara dil mek leh bawhzui a nih thu an sawi bawk.

NTUM hruaitute chuan Dawr neia sumdawng hnuaia thawkte hlawh hniam ber tur Minimum Wages zat tuk sakna, The Shop and Establishment Act hnuaia mi pawh Cabinet pawm zingah hian a tel thu sawiin, hei hi Notification chhuah ala nih ve loh thu leh Notification chhuah thuai nise an duh thu an sawi bawk a. MR/Casual-a thawkte hi Labour Law hnuaia awm an nih avangin Employees State Insurance Act 1948 chu damlo inenkawlna atan hmansak ve turin thuneitute an ngen tih an sawi a. Private hnuaia thawktute tan pawh damlo inenkawlna atan Employees State Insurance Scheme hmansak ngei turin an phut thu an sawi bawk. Heng bakah hian MR, Casual Employee leh Private hnuaia thawktute chanvo humhim a nih theih nan kum sawm hma lam atanga an lo nawr tawh, Labour Court din pawh an ngen nawn leh tih an sawi bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar