IFED hotu ten Chief Minister hmuin Mizoram-a Agriculture tihhmasawnna an sawipui

International Fund for Agricultural Development (IFED)-a Country Director Ulac Demirag leh Country Programme Analyst Piyusg Kanal te chuan nimin khan Chief Minister Zoramthanga chu hmuin Mizoram-a Agriculture tihhmasawnna chungchang aan sawipui bakah harsatna an neih te an thlen bawk.

IFED hotute nen an inkawmna ah hiaan Chief Minister chuan Agriculture leh a kaihhnawih Sector-ah Mizoram chuan potential tha tak a neih thu sawiin, heng ram in theihna a neih te hi tangkai thei ang bera haichhuah a mipuiin hlawkna an tel theihna turin hmalak thiam a pawimawh thu a sawi a. IFAD hmalakna chuan kuthnathawktute tan hamthatna a thlen ngei a beisei thu hrilhin, State sawrkar nen thawhhona tha tak neih zel a duh thu a sawi bawk. IFAD Country Director Ulac Demirag chuan khawsak harsa berte puih a, an khawsak phung in hma a sawn theihna tura eizawnna ngelnghet zawk an neih theihna tura puihna leh zirtirna pek chu an tum ber a nih thu sawiiin, Mizoram-ah chuan Agriculture behchhana mahni kutkawih eizawnna lama tui mi leh remhriatna nei tam tak an awm thu a sawi a, an hlawhtlinna theihna tura mimal chauh a an tih theih loh te chu tih sak turin FOCUS project leh sawrkar chu an thawhho a pawimawh thu a sawi bawk.

IFAD bultumin tunah hian FOCUS Project chu Agriculture Department nen thawkho in kalpui mek a ni a. IFAD hotute chuan Chief Minister hnenah hian sawrkar nen thawhhona tha tak an neih zel an beisei thu sawiin, tuna project kal mek ah harsatna an tawh thenkhat te an sawipui bawk a. Chief Minister chuan sawrkarin theihtawp a chhuahpui tur thu a sawi a ni.

FOCUS Project hian IFAD Fund hmangin hna a thawk a. SCRAM (Society for Climate Resilient Agriculture in Mizoram) chu a Implementing Agency niin Mizoram leh Nagaland ah kalpui a ni a. Mizoram-ah chuan Department pali (4)- Agriculture, Horticulture, Land Resources, Soil & Water Conservation leh Animal Husbandry & Veterinary department te thawhhona hnuaiah FOCUS Project hi kalpui a ni a, Agriculture department hi Nodal Department a ni a, Mizoram District paruk (6) – Champhai, Kolasib, Serchhip, Mamit, Saitual leh Khawzawl District chhunga khaw 300-ah hmalak niin chhungkua 42,797 ten FOCUS kaltlang hian hamthatna an dawng tawh a ni.

He Project in a tum pawimawh tak pakhat chu zawi zawi a tlangram Lo vah leh Lo hal kalsan a, sik leh sa mil a thlai kumhlun hmanga Loneitute sum dehchhuah tihpunsak a ni a. Hemi ti hlawhtling tur hian FIG (Farmers Interest Group) din niin, an ni kaltlang hian hmalak thin a ni.

FOCUS hnuaiah hian Integrated Farming System (Compact Area Development Approach) chu khaw 20-ah kalpui niin ngialnghet tak leh ram ti chereu lo zawnga huan kumhlun nei thei turin heng khaw 20 te hi hmalakpui mek an ni a. Terrace siam, tui hna khuah, tuilak leh tui dahkhawlna (Check dam, water storage & delivery system), Chang kham (log wood bunding) leh kawng laih leh siam (link road) ah te hmalak a ni.

Hei bakah hian ranvulh lamah pawh hmalak niin Sial, Vawk, Kel leh Ar vulh lamah hmalakna hi kalpui a ni a. Innovation Fund pawh thalai mi thiam, hmalak tum bultanna nei lo te tan pekchhuah a ni a. FOCUS Engineering Cell hnuai atangin kuthnathawktu chhungkaw 15 ten Mat lui an kalkai nan Suspension Bridge chu Serchhip District-ah dawh niin District paruk huamchhung ah chhungkaw 400 bawr vel tan Suspension Bridge 30 dang siam leh tura hmalak mek a ni a. Thlai thar awlsam zawka phurhchhuah a nih theih nan Agriculture Horticulture Link Road km 23 (concrete road)-a thui chu Serchhip leh Khawzawl District tan hmalak mek a ni bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar