Myanmar raltlante chhinchhiahna la kalpui thei lo

Mizoram sawrkar in Myanmar atanga raltlante chanchin kimchang leh an biometric data chipchiar taka chhinchhiahna tura sawrkar laipui atanga thupek an dawn chu tih danglam ngai a awm avangin kalpui tan ala ni lo.

Ministry of Home Affairs thupek angin Mizoram leh Manipur State-ah te Myanmar atanga raltlan lo lut te chu an chanchin kimchang taka lakhawm a, an lokalna te leh an kut zia, an mit note thlalak te leh an nihna kimchang taka lakkhawm tur a ni a. Mizoram Home Department-a Joint Secretary David H. Lalthangliana chuan Sawrkar laipuiin Myanmar raltlan te atanga an chanchin lakkhawm dan tur a buatsaih chu tihdanglam a ngaih avangin kalpui tan ala ni lo tih sawiin, hemi chungchangah hian Joint Secretary (Foreigners), MHA Anil Malik hoa sawiho niin a format chu Myanmar raltlante chanchin lakkhawm dan tura mila siam danglam turin an ti a, Joint Secretary (Foreigners) ho hian DC leh SP te nen training neih a ni tawh bawk a ni.

David H. Lalthangliana chuan National Crime Records Bureau (NCRB) leh National Informatics Centre (NIC) rawtnate chu pawmpuina nghah mek a nih thu sawiin, hemi zawh hian MHA-in a pawmpui hnuah chauh kalpui tan theih tur a ni tih a sawi a, Manipur-a buaina awm mek avangin kalpui theih la ni lo mah se sawrkar laipui chuan Mizoram-ah Pilot Project angin kalpui a nih thu leh Technical lama harsatna a awm avangin hun tiam chhunga zawh chu a harsat a rin thu a sawi bawk. Home Department hotute sawi danin Myanmar raltlan Mizorama awm zawng zawngte chu Temporary Identity Card pek vek an ni tawh bawk a ni.