Mizoram-ah kumin kumtawp lama 5G peihfel tumin Company ten hma an la mek

Information & Communication Technology (ICT) Department-a thawktute chuan kumin kumtawp lamah chuan Mizoram-ah 5G peihfel tumin Company-ten hma an la mek tih an sawi.

Thuthar thehdarhtute zawhna an chhanna ah hian ICT Depapartment-a thawktute chuan he thu hi sawiin, Mizoram-ah chuan 5G hi Jio leh Airtel company-ten an kalpui mek a, 5G danglamna sawiin, “4G-ah hian internet hi a chak tha thawkhat viau a, YouYube pawh a en theih a. Mahse, 5G-ah chuan Broadband Speed-in a awm thei dawn a, a chak tha hle dawn a ni,” tiin zirlai leh sumdawngten an tangkaipui hle dawn niin an sawi a. 5G chu damlo phur ambulance pawhin an chhawr tangkai dawn nia sawiin, “Chetsualna leh damlo na zual deuhte damdawi In panna kawngah 5G-ah chuan harsatna awm lovin lirthei atangin doctor thiamte biakpawh zung zung theih a ni dawn a. Doctor thiam ten damdawi In atangin damlote an vil thei dawn a, a tangkai thei hle dawn a ni,” an ti. Tarlan tawh angin kumin kumtir lama Mizoram Governor in Airtel hotute a kawmna ah Aizawl leh Lunglei-ah 5G Network hman theih tura hma an lak thu an lo sawi tawh a ni.

Hetihlai hian Telecom Regulatory Authority of India-in tunhnaia report a tihchhuahah National average aiin Mizoram-ah Mobile hmangtu an tam zawk tih tarlan niin, National average-ah mi 100 zela 84.56-in mobile an nei anga chhut a nih laiin Mizoram-ah chuan mi 100 zela 113-in an nei anga chhut a ni a. ICT Department-a thawktute chuan Mizoram chu mipui chengte atanga chhutin India rama Mobile Phone Connection nei tam zingah a tel thu leh mipui cheng za zel atanga chhuta mobile phone connection nei zat tehna (tele density)-ah pawh a sang pawl a ni tih an sawi a. Tehna atanga a lan danin mobile connection hi thingtlang lam (rural)-ah mi 100 zela 45 leh khawpuiah mi 100 zela 124.48 ten an nei anga chhut a ni a. Phone connection nei an tam chhan hi sim card hmang kawp (dual sim) an tam vang nia an rin thu an sawi bawk.

Tun dinhmunah Mizoram-ah Mobile Phone Service Company pali - Airtel, Jio, BSNL leh Vodafone an awm mek a, tunlaia Mobile Phone-a inbiak har te, tawng inhriat hleihtheih loh leh inbiak laia tawp chut chut ang chi chu Mobile signal that tawk loh vang a ni tih sawiin ICT thawkte chuan, “Company-te hian tower hi phun belh an duh a; mahse Veng hrang hrangah dodalna a awm avangin an duh angin hma an la thei lo a. Tower hian natna thenkhat a thlen thei nia sawi a awm avangin a bulhnaia miten an complaint nasa a, veng thenkhata Local Council-te pawhin complaint an thehluh avangin inbiak kawngah harsatna a awm phah a ni,” an ti bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man